މި އަހަރުގެ ޖުލައި މަހުގެ 31 ވަނަ ދުވަހު ހުޅުމާލެ ފޭސް 2 ގައި ހިނގި ނުރައްކާތެރި ކާރު އެކްސިޑެންޓާ ގުޅިގެން، އެ ކާރު ދުއްވަން އިން އިބްރާހިމް އިކްރާމް ހައްޔަރުކޮށް އޭނާގެ ތަހުގީގު ނުނިމެނީސް ހައި ކޯޓުން އޭނާ ދޫކޮށްލުމަށް ހުކުމް ކުރުމުގައި ތަހުގީގީ މަރުހަލާގެ އިހުމާލެއް ވާނަމަ އެކަން ބަލައި އެންމެ ހަރުކަށި ފިޔަވަޅު އަޅާނެ ކަމަށް، ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.

އިކްރާމްގެ ފަރާތުން ހައި ކޯޓުގައި ހުށަހެޅި އިސްތިއުނާފާ ގުޅިގެން އޭނާ ދޫކޮށްލުމަށް އަމުރުކުރީ، ޝަރީއަތް ނިމެންދެން އޭނާ ހައްޔަރުގައި ބަހައްޓަން ނެރުނު އަމުރު ނެރެފައިވަނީ ގޯސްކޮށްކަމަށް ކަނޑައަޅައެވެ. އެއީ، އެ ހާދިސާގައި އިކްރާމް ކޯޓަށް ހާޒިރުކޮށް ޝަރީއަތް ފެށި އިރު އޭނާގެ ވަކީލަށް އަންގާފައި ނުވާތީއެވެ.

މި މައްސަލައާ ގުޅިގެން، ހޯމް މިނިސްޓަރ އެކްސްގައި ކުރެއްވި ޕޯސްޓެއްގައި ވިދާޅުވީ، ކޯޓު އަމުރެއްގެ ދަށުން އިކްރާމް އަލުން ހައްޔަރު ކުރުމުގެ މަސައްކަތް ކުރިއަށްދާ ކަމަށެވެ. އަދި ދޫކޮށްލި މީހާ ކޯޓު އަމުރެއްގެ ދަށުން އަލުން ހައްޔަރު ކުރުމުގެ މަސައްކަތް ކުރިޔަށްދާ ކަމަށް ވެސް ވިދާޅުވެފައިވެއެވެ.

ހުޅުމާލެ ފޭސް 2 ގެ ވިނަރެސް ފްލެޓުތައް ކައިރިން ހިނގި މި އެކްސިޑެންޓަކީ ބާރު ސްޕީޑުގައި ދުއްވި ކާރެއް ކޮންޓްރޯލުން ނެއްޓި، އެ މަގުގެ އެއް ފަރާތުގައި ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހިގެން ހިނގި އެކްސިޑެންޓެކެވެ

އެކްސިޑެންޓުގެ ފޮޓޯތަކުން ފެންނަ ގޮތުގައި އެކްސިޑެންޓުވި ކާރަކީ މާލެ ޒޯންގައި ދުއްވަން ރަޖިސްޓްރީކޮށްފައިވާ އުޅަނދެއް ވެސް ނޫނެވެ. ކާރުގެ ނަންބަރު ޕްލޭޓްގައި އިނީ ބީ ޒޯން [ނުވަތަ ރާއްޖޭގެ އުތުރާއި ދެކުނުގެ އަތޮޅުތަކުގައި] ދުއްވަން ރަޖިސްޓްރީކޮށްފައެވެ.