ވަޒީފާ އަދާކުރާ ބިދޭސީންނާއި މެދު އިހުމާލުވާ ފަރާތްތައް 50000ރ އިން ޖޫރިމަނާކުރެވޭ ގޮތަށް، ވަޒީފާ އާއި ބެހޭ ޤާނޫނަށް އިސްލާހް ގެނައުމުގެ ބިލް ރައީސުލްޖުމްހޫރިއްޔާ، ޑރ. މުހައްމަދު މުއިއްޒު މިއަދު ތަސްދީޤު ކުރައްވައި ގެޒެޓުކުރައްވައިފިއެވެ.

މި ބިލަކީ، 2024 އޯގަސްޓު 19 ވީ ހޯމަ ދުވަހު ބޭއްވެވި ރައްޔިތުންގެ މަޖިލީހުގެ 2024 ވަނަ އަހަރުގެ ދެވަނަ ދައުރުގެ 30 ވަނަ ޖަލްސާއިން ފާސްކުރެއްވި ބިލެކެވެ.

ބިދޭސީ މުވައްޒަފުންނާ މެދު އިހުމާލުވާ ފަރާތްތަކުން އިހުމާލުވާ ކޮންމެ މުވައްޒަފަކަށް 50,000ރ. ގެ މަގުން ޖޫރިމަނާ ކުރެވޭ ގޮތަށް ޤާނޫނު އިސްލާޙް ކުރުމުގެ އިތުރުން، ކޮންމެ ތިން އަހަރަކުން ކޯޓާ ފީ އާއި ވާކް ޕާމިޓް ފީ ބޮޑުކުރެވޭ ގޮތަށްވެސް މިޤާނޫނަށް ގެނައި އިސްލާޙުގެ ތެރޭގައި ހިމަނާފައިވެއެވެ. މިގޮތުން ކޮންމެ 3 އަހަރަކުން %30 އާއި ހަމައަށް ކޯޓާފީއާ ވިސާފީ ބޮދު ކުރަމުން ގެންދެވޭނެއެވެ. މިހާރު ކޯޓާ ފީގެ ގޮތުގައި 2000ރ އަހަރަކު ދައްކަން ޖެހޭއިރު، 4200ރ ދައްކަން ޖެހޭނެއެވެ.

ރައީސުލްޖުމްހޫރިއްޔާ މި ބިލު ތަސްދީޤުކުރެއްވުމާ ގުޅިގެން ވަޒީފާއާބެހޭ ޤާނޫނުގެ ދަށުން އެކުލަވާލާފައިވާ ގަވާއިދުތަކަށް ގެންނަންޖެހޭ އިޞްލާޙުތައް، މިއަދުން ފެށިގެން 3 މަސްދުވަހުގެ ތެރޭގައި އެކުލަވާލައި، ދިވެހި ސަރުކާރުގެ ގެޒެޓުގައި ޝާއިޢުކުރަން ޖެހޭނެއެވެ.