ސަރުކާރުގެ ބައެއް ކުންފުނިތައް އެއްކޮށްލުމުން، އެކުންފުނިތައް ހިންގުމަށް ދައުލަތުން ކުރަންޖެހޭ ޚަރަދު ވަރަށް ބޮޑަށް ކުޑަވެ ރައްކާކުރެވޭ ފައިސާ އިތުރުވެގެންދާނެ ކަމުގައި މިނިސްޓަރ އޮފް އިކޮނޮމިކް ޑިވޮލޮޕްމެންޓް މުޙައްމަދު ސަޢީދު ވިދާޅުވެއްޖެއެވެ.

މިނިސްޓަރ ސަޢީދު މިހެން ވިދާޅުވީ، މިއަދު ވަޒީރުންގެ މަޖިލީހުގެ ނިންމުންތައް ހާމަކުރެއްވުމުގެ ގޮތުން ބޭއްވި ނޫސްކޮށްފަރެންސްގައި ނޫސްވެރިން ކުރެއްވި ސުވާލުތަކަށް ޖަވާބު ދެއްވަމުންނެވެ.

މިނިސްޓަރ ސަޢީދު ވިދާޅުވީ، މޯލްޑިވްސް އެއާޕޯޓްސް ކޮމްޕެނީއާ، އާއި ރީޖަނަލް އެއާޕޯޓްސް އެއްކޮށްލައި، އަދި އެޗްޑީސީގެ ދަށަށް ފަހިދިރިއުޅުން ކޯޕަރޭޝަން ބަދަލުކޮށް، މޯލްޑިވްސް ފަންޑް މެނޭޖްމަންޓް ކޯޕަރޭޝަން، ބިޒްނަސް ސެންޓާ ކޯޕަރޭޝަންއާ އެއްކޮށްލައި، އަދި އެގްރޯ ނެޓް މޯލްޑިވްސް، މޯލްޑިވްސް އިންޑަސްޓްރިއަލް ފްރީ ޒޯންގެ ބައެއްގެ ގޮތުގައި ބަދަލު ކުރަން ނިންމާފައިވާ ކަމަށެވެ.

މިނިސްޓަރ ސަޢީދު ފާހަގަކުރެއްވި ގޮތުގައި ސަރުކާރުގެ އެންމެ ބޮޑު އަމާޒެއް ހިފާފައި ވަނީ އިޤުތިޞާދު ސިންދަފާތުކޮށް ކުރިއެރުވުމަށް ރައީސުލްޖުމްހޫރިއްޔާ އެކަށައަޅުއްވާފައިވާ އެޖެންޑާ ތަންފީޒް ކުރުމަށެވެ. އަދި އެ އެޖެންޑާއަކީ ވޯލްޑްބޭންކާއި އައިއެމްއެފް ފަދަ ދުނިޔޭގެ މާލީ އިދާރާތަކުން ތަޢުރީފުކޮށްފައިވާ އެޖެންޑާއެއް ކަމުގައި މިނިސްޓަރ ސަޢީދު ވިދާޅުވިއެވެ.

މިނިސްޓަރ ސަޢީދު ވިދާާޅުވީ، މިބަދަލުތައް ސަރުކާރުގެ ތެރެއިން ގެންނަމުންދާނީ، މުވައްޒަފުންނަށް އެކަމުގެ އަސަރު އެންމެ ކުޑަގޮތްތަކަށް ބަލައިގެން ކަމަށެވެ. އަދި އެއްވެސް ދިވެހިި ރައްޔިތެއްގެ ވަޒީފާއެއް ގެއްލުމަކީ، ރައީސުލްޖުމްހޫރިއްޔާ ބޭނުންފުޅުވާ ކަމެއް ނޫންކަމުގައިވެސް މިނިސްޓަރ ސަޢީދު ވިދާޅުވިއެވެ.

ސަޢީދު އެންމެ ބޮޑަށް ފާހަގަކުރެއްވި ގޮތުގައި، ކުންފުނިތަކަށް އޮފީސްތައް ކުއްޔަށް ހިފުމާއި، އިދާރީ އެހެނިހެން ޚަރަދުތަކަށް ހިނގާ ހޭދަ ބޮޑެވެ. އެހެންކަމުން ސަރުކާރުން އަޅުއްވަން ނިންމެވި މިފިޔަވަޅުތަކުގެ ސަބަބުން އެ ހޭދަތައް ކުޑަވެގެން ދާނެކަން މިނިސްޓަރ ސަޢީދު ފާހަގަކުރެއްވިއެވެ.