މިހާރު ކުރިއަށްދާ ވަޒީރުންގެ މަޖިލީހުގައި، ސަރުކާރުގެ ބައެއް ކުންފުނިތައް އެއްކޮށްލުމާއި ގުޅޭ ގޮތުން މަޝްވަރާކުރައްވާނެ ކަމުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު ބާއްވާ ވަޒީރުންގެ މަޖިލީހުގެ ބައްދަލުވުން ފެށުމުގެ ކުރިން، ދެއްވި ބަޔާނުގައެވެ. 

އެބަޔާނުގައި އެމަނިކުފާނު ވަނީ، މިދިޔަހަފްތާގައި ފެނަކަ ކޯޕަރޭޝަން އެސްޓީއޯގެ ދަށަށް ބަދަލުކުރުމަށް ސަރުކާރުން ނިންމެވި ނިންމެވުމަކީވެސް ވަރަށް މުހިއްމު ނިންމެވުމެއް ކަމުގައި ފާހަގަކުރައްވާފައެވެ. ރައީސުލްޖުމްހޫރިއްޔާ ވިދާޅުވީ، މިއަދު މަޝްވަރާކުރައްވާނެ ކަންކަމުގެ ތެރޭގައި، އެމްއޭސީއެލްގެ ދަށަށް ރީޖަނަލް އެއާޕޯޓްސް ބަދަލުކުރެއްވުމާއި،  އެޗްޑީސީގެ ދަށަށް ފަހި ދިރިއުޅުން ކޯޕަރޭޝަން ބަދަލުކުރުމާއި މޯލްޑިވްސް ފަންޑު މެނޭޖުމަންޓު ކޯޕަރޭޝަނާއި ބިޒްނަސް ސެންޓަ ކޯޕަރޭޝަން (ބީސީސީ) އެއްކޮށްލައިގެން ހިންގޭނެ ގޮތްތައް ހޯދުން ހިމެނޭ ކަމަށެވެ.

ރައީސުލްޖުމްހޫރިއްޔާ ވިދާޅުވީ މިބަދަލުތަކާއި އެކުަގައި ރައްޔިތުންނަށް ވާނެ ވަރަށް ގިނަ ގުނަ ފައިދާތައް އެބަހުރި ކަމުގައެވެ. 

ރާއްޖޭގެ އިޤުތިޞާދީ ޙާލަތު އިންތިހާއަށް ގޯސްވެފައި ވާއިރު، ދަރަނި ނުދެއްކި ރާއްޖެ ބަނގުރޫޓުވެދާނެ ކަމަށް މާލީ އިދާރާތަކުން އަންނަނީ އިންޒާރުތައް ދެމުންނެވެ. އަދި ޚަރަދުކުޑަކުރުމަށް ފިޔަވަޅުތައް އެޅުން އަވަސްކުރުމަށް މާލީ އިދާރާތަކުން އަންނަނީ ސަރުކާރަށް ގޮވާލަމުންނެވެ.