އެމްޑީޕީއާއެކު ކޯލިޗަން ހަދާފައިވާ ޕާޓީ އެމްޑީއޭގެ ޕޮލިޓިކަލް ސެންޓަރ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ހުޅުއްވައިދެއްވައިފިއެވެ.

ރައީސުލްޖުމްހޫރިއްޔާ މިސެންޓަރު ހުޅުއްވައި ދެއްވީ، މިއަދު ފުވައްމުލަކަށް ފެއްޓެވި ކެމްޕޭން ދަތުރުފުޅުގެ ތެރެއިން މިއަދު ހަވީރުއެވެ. ރައީސުލްޖުމްހޫރިއްޔާގެ އަރިހުގައި، އެމްޑީއޭގެ ލީޑަރު އަޙްމަދު ސިޔާމް މުހައްމަދުވެސް ބައިވެރިވެވަޑައިގަންނަވައެވެ. 

އެމްޑީއޭގެ ޕޮލިޓިކަލް ސެންޓަރު ހުޅުއްވައި ދެއްވުމަށްފަހުގައި ރައީސުލްޖުމްހޫރިއްޔާ ވަނީ ޢިއްޒަތްތެރިން ސޮއެކުރައްވާ ފޮތުގައި ލިޔުއްވައި ސޮއެކުރައްވާފައެވެ. 

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ފުވައްމުލަކަށް ކުރައްވާ މިކެމްޕޭން ދަތުރުފުޅުގައި  އެމަނިކުފާނުގެ ނައިބު ފައިޞަލް ނަސީމްވެސް ބައިވެރިވެވަޑައިގަންނަވައެވެ. ފުވައްމުލަކަކީ، ރައީސުލްޖުމްހޫރިއްޔާގެ ނައިބު ފައިޞަލް ނަސީމްގެ އުފަންރަށެވެ. އަދި އެމަނިކުފާނުގެ އާއިލާގެ ބޭފުޅުންނާއި ގާތްތިމާގެ ބޭފުޅުންގެ ތެރެއިން ގިނަ އަދަދެއްގެ ބޭފުޅުންވެސް ދިރިއުޅުއްވަނީ އެރަށުގައެވެ.

ރައީސުލްޖުމްހޫރިއްޔާ މިއަދު ފުވައްމުލަކަށް ކުރެއްވި ޒިޔާރަތުުގެ ތެރެއިން މިރޭ އެރަށުގައި ބޮޑު ކެމްޕޭން ޖަލްސާއެއް އޮންނާނެއެވެ.