ދިވެހި އަންހެނެއްގެ ކަރުގައި ވަޅިޖައްސައި އޭނާ ރަހީނުކޮށްގެން ފުލުހުންނަށް ފިލަން އުޅެނިކޮށް ހައްޔަރުކުރި، ށ. މިލަންދޫ ހެޕީލޭންޑް، އާދަމް އަޠުހަރު (32އ) ޝަރީޢަތް ނިމެންދެން ބަންދުކޮށްފަިއ ބެހެއްޓުމަށް ކްރިމިނަލް ކޯޓުން ފުލުހުންނަށް އަމުރު ދީފިއެވެ.

ފުލުހުން އޭނާ ހައްޔަރުކޮށްފައި ވަނީ، އޭނާ ރަހީނުކުރި އަންހެންމީހާ ސަލާމަތް ކުރަން އުޅުމުގެ ތެރޭގައި އޭނާއަށް ލިބުނު އަނިޔާތަކަށް ހޮސްޕިޓަލުގައި ފަރުވާ ދިނުމަށްފަހު ދޫކޮށްލުމުންނެވެ. އަދި އޭނާ ހައްޔަރުކުރުމަށްފަހު އަނެއްކާވެސް އިތުރު ފަރުވާއަށް އޭނާ ވަނީ އައިޖީއެމް ހޮސްޕިޓަލަށް ގެންގޮސްފައެވެ. ފުލުހުންގެ އިދާރާއިން ވިދާޅުވީ، އަޠުހަރަށް އެހޮސްޕިޓަލުގައި ފަރުވާ ދިނުމަށްފަހުގައި މިއަދި ހެނދުނު އޭނާ ހޮސްޕިޓަލުން ދޫކޮށްލާފައި ވާކަމަށެވެ.

އަޠުހަރުގެ ޞިއްޙީ ޙާލު ގޯސްކަމަށް ބުނެ ފެތުރި ވާހަކަތައް ފުލުހުންގެ އިދާރާއިން ވަނީ ދޮގުކޮށްފައެވެ.

އަޠުހަރަށް އަނިޔާވީ، އޭނާ ރަހީނުކޮށްފައި ހުރި އަންހެންމީހާ، އޭނާގެ އަތްދަށުން ސަލާމަތް ކުރުމަށް، ފުލުސް އޮފިސަރަކު ފުރަގަހުން ކައިރިވެ އޭނާގެ ބޮލުގައި މުގުރުން ޖެހުމުގެ ސަބަބުންނެވެ. އަދި އޭނާ ވެއްޓުމުން އާއްމުންވެސް އޭނާގެ ގަޔަށް އަަރައިގަތްތަން، ވީޑިއޯއިން ފެނެއެވެ.

އަޠުހަރަށް ލިބިފައިވާ ޒަޚަމާއި އޭނާގެ ޞިއްޙީ ޙާލަތު ފުލުހުންވެސް ހާމައެއް ނުކުރެއެވެ. އަޠުހަރުގެ އަތްދަށުން އަންހެންމީހާ ސަލާމަތް ކުރުމުގައި ފުލުހުން އަމަލު ކުރިގޮތަށް އެއްބައި ފަރާތްތަކުން ތަޢުރީފުކޮށްފައިވާ އިރު އެކަމަށް ބައެއް ފަރާތްތަކުން ވަނީ ފާޑުވެސް ކިޔާފައެވެ.