އިޓަލީގެ ދެވަނަ ޑިވިޝަނުގައި އޮތް ސަމްޑޯރިއާގެ ކޯޗުގެ މަގާމުގައި ހުރި އިޓަލީގެ ކުރީގެ މިޑްފިލްޑަރ، އެންޑްރެއަސް ޕިރްލޯ އޭނާގެ މަގާމުން ވަކިކޮށްފިއެވެ.

ޕިރްލޯ މަގާމުން ވަކިކޮށްފައިވަނީ އިޓަލީގެ ދެވަނަ ޑިވިޝަން، ސީރީ-ބީ ގެ ސީޒަން ފެށިއިރު އެ ކްލްބުން ނެރެމުންދާ ނަތީޖާތަކަށް ކްލަބުގެ މެނޭޖުމެންޓުން ހިންހަމަ ނުޖެހިގެންނެވެ.

މިދިޔަ ސީޒަން ސީރީ-ބީގެ 7 ވަނައިގައި ނިންމާލެވުނު ނަމަވެސް، ސަމްޑޯރިއާގެ މެނޭޖުމެންޓުން ޕިރްލޯ މި ސީޒަންގައި ބެހެއްޓުމަށް ނިންމީ، ޕިރްލޯއަށް އިތުރު ފުރުސަތެއް ދިނުމަށްފަހު ޓީމު ސީރީ-އޭ އަށް ގެނެވޭނެ ތޯ ބެލުމަށެވެ. ނަމަވެސް ސީޒަންގެ ފުރަތަމަ މެޗުގައި އެއްވަރު ވުމަށްފަހު ޖެހިގެން އައި ދެ މެޗުން ބަލިވުމާ ގުޅިގެން، އެ ކުލަބުގެ މެނޭޖުމެންޓުން ނިންމީ އޭނާ މަގާމުން ވަކިކުރުމަށެވެ.

ޕިރްލޯގެ ލަފާގެ މަތިން ސަމްޑޯރިއާ 45 މެޗު ކުޅެފައިވާ އިރު، އެތަނުން 18 މެޗުން ވަނީ އެ ޓީމު މޮޅުވެފައެވެ. އަދި 10 މެޗުން އެއްވަރު ވެފައިވާއިރު 17 މެޗުން ވަނީ ބަލިވެފައެވެ.