ހުޅުމާލެ ފޭސް 2 ގެ ހިޔާ ފްލެޓްތަކުގެ އިރުމަތީ ފަރާތަށް މޫދަށް އެރޭ މީހުން ފެންވަރައި ގައިން ލޮނު ފިލުވާލުމަށް އެޗްޑީސީން ބެހެއްޓި ޝަވަރުތައް ދޮށުގައި ސައިކަލު ދޮންނަ ކަމުގެ ޝަކުވާ ބޮޑުވެއްޖެއެވެ.

ދާދި ފަހުން އެޗްޑީސީ ހުޅުމާލެ ފޭސް 2 ގެ އިރުމަތީ ފަރާތުގައި ހަދާފައިވާ ފާޚާނާ ބަރިއާ ޝަވަރުތައް ކައިރީގައި ދެ މީހަކު ސައިކަލު ދޮންނަ މަންޒަރު ފެންނަ ފޮޓޯތަކެއް މީހަކު ވަނީ، ސޯޝަލް މީޑިއާގައި ޕޯސްޓްކޮށް ކަންބޮޑުވުން ފާޅުކޮށްފައެވެ. 

އޭނާ ކަންބޮޑުވުން ފާޅުކޮށްފައި ވަނީ، އާއްމު ބޭނުމަށް ބަހައްޓާފައި ހުރި ފެންމާގަނޑުތަކުން ނަހަމަ ބޭނުން ހިފާތީއެވެ. އެ ފެންމާގަނޑުތަކަކީ އާއްމުކޮށް އެންމެންނަށް ހިލޭ ފެން ލިބޭ ގޮތަށް ބަހައްޓާފައި ހުރި ފެންމާގަނޑުތަކެކެވެ. 

ހުޅުމާލެ ފޭސް 1 ގެ ފަތާ ޓްރަކް ސަރަހައްދުގައިވެސް އެޗްޑީސީން އެފަދަ ފެންމާގަނޑުތައް ބަހައްޓާފައި ވާއިރު، އެތަންތަނުގައި ބޭނުންކުރާ ފެނަށް ބިލްދައްކާނީ އެޗްޑީސީންނެވެ. އެހެންވެ އާއްމުން ކަންބޮޑުވުން ފާޅުކޮށްފައި ވަނީ، ހިލޭ ދޫކޮށްފައިވާ ފެނުގެ ބޭނުން ނަހަމަ ގޮތުގައި ހިފާތީއާއި، ސައިކަލު ފަދަ އެއްގަމު އުޅަނދުތައް ދޮވެދިނުމަކީ، އަގު ނަގައިގެން ގަރާޖުތަކުންވެސް ދެމުން އަންނަ ޚިދުމަތަކަށް ވާތީއެވެ.