ރިޔާސީ އިންތިޚާބުގެ ކެމްޕޭން ދަތުރުފުޅުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ފުވައްމުލައް ސިޓީއަށް ވަޑައިގެންނެވުމުން އެރަށުގެ ރައްޔިތުންގެ ފަރާތުން ރައީސަށް ވަރަށް ހޫނު މަރުހަބާއެއް ދަންނަވައިފިއެވެ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙަށް ފުވައްމުލައް ސިޓީ އެއާޕޯޓުން އިސްތިޤުބާލް ކުރެއްވީ ރައީސުލްޖުމްހޫރިއްޔާގެ ނައިބު ފައިޞަލް ނަސީމާއި އެސިޓީގެ މޭޔަރާއި އިސްބޭފުޅުންނެވެ. ރައީސުލްޖުމްހޫރިއްޔާއަށް މަރުޙަބާ ދެންނެވުމަށްޓަކައި ފުަވައްމުލަކުގެ ވަރަށް ގިނަ ޢަދަދެއްގެ ރައްޔިތުން، އެއާޕޯޓް ސަރަޙައްދަށް ޖަމާވިއެވެ. 

ރައީސުލްޖުމްހޫރިއްޔާގެ މިކެމްޕޭން ދަތުރުފުޅުގައި އެމަނިކުފާނުގެ އަރިހުގައި ކޯލިޝަން ޕާޓީ އެމްޑީއޭގެ ލީޑަރު އަޙްމަދު ސިޔާމް މުހައްމަދުވެސް ބައިވެރިވެވަޑައިގެންނެވިއެވެ.

ރައީސުލްޖުމްހޫރިއްޔާގެ ކެމްޕޭން މިދަތުރުފުޅުގެ ތެރެއިން މިރޭ ފުވައްމުލައް ސިޓީގެ ރައްޔިތުންނާއި ބައްދަލުކޮށްލެއްވުންވެސް އޮންނާނެއެވެ.

ރައީސުލްޖުމްހޫރިއްޔާ ފުވައްމުލަކުން ފުރާވަޑައިގަންނަވާނީ މާދަމާއެވެ.