2023/24 ސީޒަނުގައި ޔޫރަޕްގެ ބޮޑެތި ލީގުތަކުގައި ކުޅޭ ކުޅުންތެރިންގެ ތެރެއިން އެންމެ ގިނަ ގޯލު ޖެހި ކުޅުންތެރިޔާގެ އެވޯޑު ބެޔާން މިއުނިކްގެ އިނގިރޭސި ފޯވާޑް، ހެރީ ކޭން ހާސިލްކޮށްފިއެވެ. އޭނާ މި އެވޯޑު ހާސިލްކޮށްފައި މިވަނީ މިދިޔަ ސީޒަނުގައި 36 ގޯލު ޖަހައިގެންނެވެ.

މި އެވޯޑާއި ހަވާލުވުމަށްފަހު ކޭން ބުނެފައިވަނީ، މިއީ ބެޔާން މިއުނިކަށް ލިބުނު އެވޯޑެއް ކަމަށާއި، މި އެވޯޑުގެ ޝުކުރު ހައްގީ ކްލަބާއި ކުޅުންތެރިންނަށް ކަމަށެވެ.

މިއީ ބެޔާން މިއުނިކްގެ ކުޅުންތެރިއަކަށް މި އެވޯޑު ލިބުނު ތިން ވަނަ ފަހަރެވެ. ކޭންގެ އިތުރުން މި އެވޯޑު ހާސިލްކޮށްފައިވަނީ ޖާރޑް މުލާއާއި ރޮބަރޓް ލެވަންޑޯސްކީއެވެ.

މީގެ އިތުރުން ހެރީ ކޭން އަކީ މި އެވޯޑު ހާސިލްކުރި ދެވަނަ އިނގިރޭސި ކުޅުންތެރިޔާއެވެ. މީގެ ކުރިން 2000 ވަނަ އަހަރު ކެވިން ފިލިޕްސް ވަނީ މި އެވޯޑު ހާސިލްކޮށްފައެވެ.

ޔޫރަޕްގެ ރަން ބޫޓް ތައާރަފް ކުރި ފަހުން މި އެވޯޑް އެންމެ ގިނައިން ހޯދާފައިވަނީ ކުރިން ބާސެލޯނާއަށް ކުޅުނު އާޖެންޓީނާގެ ލިއޮނެލް މެސީއެވެ. އޭނާ ހަ ފަހަރު މި އެވޯޑް ހޯދާފައިވާއިރު، ޕޯޗުގަލްގެ ކްރިސްޓިއާނޯ ރޮނާލްޑޯ ވަނީ ހަތަރު ފަހަރު މި އެވޯޑު ހޯދާފައެވެ. އަދި އެންމެ ފަހުން މި އެވޯޑް ކާމިޔާބުކޮށްފައިވަނީ މެންޗެސްޓަރ ސިޓީގެ އާލިން ހާލަންޑްއެވެ.