ރައީސް ޔާމީނުގެ ވެރިކަމުގައި 28 ސެޕްޓެމްބަރު 2015ގައި ހިނގި ފިިނިފެންމާ ލޯންޗުގައި އެއްޗެއް ގޮވުމުގެ ހާދިސާއަކީ ރައްީސް ޔާމީނު ކުޅުއްވި ޑްރާމާއެއް ކަމުގައި، ރައްޔިތުންގެ މަޖިލީހުގެ ރައީސް ޢަބްދުއްރަހީމް ތުހުމަތު ކުރައްވައިފިއެވެ.

ރައްޔިތުންގެ މަޖިލީހުގެ ރައީސް އަދި ފޮނަދޫ ދާއިރާގެ މެމްބަރު، ޢަބްދުއްރަހީމަކީ، 2013 ވަނަ އަހަރުން 2018 ވަނަ އަހަރަށް ދެމިއޮތް ރައީސްޔާމީނުގެ ވެރިކަމުގައި އެމަނިކުފާނުގެ އެންމެ އަރިހުގައި މަސައްކަތް ކުރެއްވި އެއްބޭފުޅާއެވެ. ކުރިން ރައީސް ޔާމީނާއި ގާތްގުޅުމެއް އޮތް އަބްދުއްރަހީމާއި، ރައީސް ޔާމީން ހަތުރުންނަށް ވެފައި، ވަނީ، ރައީސް ޔާމީނުގެ ތާއީދާއިއެކުގައި ރައީސުލްޖުމްހޫރިއްޔާގެ މަޤާމަށް، ޑރ. މުހައްމަދު މުޢިއްޒު ވަޑައިގެންނެވި ފަހުންނެވެ. އަދި މިފަހުން ޢަބްދުއްރަހީމްވެސް ގެންދަވަނީ، ސިޔާސީ އެކި ޕޯޑިއަމްތަކާއި އިންޓަރވިއުތަކުގައި ރައީސް ޔާމީނަށް އެއްޗެހި ގޮވަމުންނެވެ.

ސަންގުޓީވީއަށް ދެއްވި ޚާއްޞަ ބަސްދީގަތުމުގައި ޢަބުދުއްރަހީމް ވިދާޅުވީ، އަބްދުއްރަހީމް ވަނީ އެހާދިސާ އާއި ގުޅުވައިގެން ރައީސް ޔާމީނު ދެއްކެވި ވާހަކަފުޅުތަކާއި މެދުވެސް ސުވާލު އުފައްދަވާފައެވެ. ޢަބްދުއްރަހީމް ވިދާޅުވީ، ލޯންޗު ގޮއްވާލީމާ ރައީސް ޔާމީނަށް ބޭރަށް ނުކުމެވުނީމަ ބޮޑު ފާލަމާ ދިމާޔަށް ބަލާލިއިރު އެތަނުގައި ނޫ ކުލައިގެ ޓީޝާޓެއް ލައިގެން ހުރި މީހަކު ހުއްޓައި ފެނުނު ކަމަށާއި، ލޯންޗު ގޮއްވާލި މީހަކީ އެއީކަން ވަގުތުން އެނގުނު ކަމުގައި ރައީސް ޔާމީން ވިދާޅުވި ކަމަށެވެ.

އޭރު އެކަމާއި ގުޅޭ ގޮތުން އެއްވެސް ސުވާލެއް ނުއުފެދޭތޯ ދެންނެވި ސުވާލަށް ޖަވާބު ދެއްވަމުން ޢަބްދުއްރަހީމް ވިދާޅުވީ، އޭރު އެކަމާއި ގުޅޭ ގޮތުން އެއްވެސް ސުވާލެއް ނުއުފެދޭ ކަަމަށާއި، އޭރު ތިބީ ރައީސް ޔާމީނު ދައްކަވަމުން ގެންދެވި ވާހަކަފުޅުގެ މައްޗަށް އިތުބާރުކޮށްގެން ކަމުގައިވެސް އޭނާ ވިދާޅުވިއެވެ.

އެހެން ނަމަވެސް މިއަދު ރައީސް ޔާމީނު ކަންތައް ކުރައްވާގޮތުންނާއި، ރައީސް ޔާމީނު އޭރު ދެއްކެވި ވާހަކަފުޅާއި، މިހާރުދައްކަވާ ވާހަކަފުޅުތައް ގުޅުވާލީމާ މިހާރު އެސުވާލުތައް އުފެދެން ޖާގަ ލިބޭ ކަމުގައި ޢަބްދުއްރަހީމް ވިދާޅުވިއެވެ. 

ރައީސް ޔާމީނުގެ ވެރިކަމުގައި ރައީސް އޮފީހުގެ ތަރުޖަމާނުގެ މަޤާމުގައި ހުންނެވި، އިބްރާހިމް މުޢާޛު ޢަލީވެސް ވަނީ، 2018 ވަނަ އަހަރުގެ ރިޔާސީ އިންތިޚާބަށް ފަހުގައި، ފިނިފެންމާ ހާދިސާއަކީ ޑްރާމާއެއް ކަމުގައި ވިދާޅުވެ ވާހަކަފުޅު ދައްކަވާފައެވެ.

2015 ސެޕްޓެންބަރު 28 ވަނަ ދުވަހު ރިޔާސީ ލޯންޗްކޮޅު "ފިނިފެންމާ"ގައި އެއްޗެއް ގޮއްވައިލި ހާދިސާގައި، ރައީސުލްޖުމްހޫރިއްޔާގެ އަނބިކަނބަލުން، ފާޠިމަތު އިބްރާހީމަށް އަނިޔާވެ އައިޖީއެމްއެޗް ހޮސްޕިޓަލުގައި އެޑްމިޓްކުރައްވައި، ފަރުވާދެއްވާފައި ވެއެވެ.