އެންމެ ފަހުން ބޭއްވި ކޮޕާ އެމެރިކާގެ އެންމެ މޮޅު ކުޅުންތެރިޔާގެ މަގާމު ހޯދި، ކޮލަމްބިޔާގެ ޕްލޭ މޭކަރ، ހަމޭސް ރޮޑްރިގޭޒް އޭނާގެ ޕްރޮފެޝަނަލް ކެރިއަރުގެ 11 ވަނަ ކްލަބަށް ބަދަލުވުމަށް ނިންމައިފިއެވެ. މިހާތަނަށް ދުނިޔޭގެ ތަފާތު 10 ލީގެއްގައި ކުޅެފައިވާ ރޮޑްރިގޭޒް މި ފަހަރު އޭނާ އެނބުރި ދާނީ ސްޕެއިން އަށެވެ.

ހޯމަ ދުވަހު ސްޕެނިޝް ލީގުގެ ރިއަލް ވަލަކާނޯ އިން ވަނީ ކޮލަމްބިއާގެ ގައުމީ ޓީމުގެ ކެޕްޓަން އެ ޓީމަށް ހިލޭ ޓްރާންސްފާރ އެއްގައި ގުޅޭނެކަން ހާމަކޮށްފައެވެ.

އުމުރުން 33 އަހަރުގެ ރޮޑްރިގޭޒް އެންމެ ފަހުން ކުޅެމުން އައި ބްރެޒިލްގެ ސައޯ ޕައުލޯއާ ދެމެދު ހަދާފައިވާ އެއްބަސްވުން ވަނީ މިދިޔަ ސީޒަން ނިންމުމަށްފަހު އުވާލާފައެވެ. އަދި އެއަށްފަހު ވަލަކާނޯއަށް އޭނާ މި ބަދަލުވީ އެއް އަހަރުގެ ކޮންޓްރެކްޓެއްގައެވެ. ނަމަވެސް ބޭނުންނަމަ، އިތުރު އެއް އަހަރަށް އެގްރީމެންޓު ދައްމާލެވިދާނެކަމަށް ބުނާ މާއްދާއެއް ވެސް މި އެއްބަސްވުމުގައި ވެއެވެ.

ގިނަ ދުވަސްތަކެއްވުމަށްފަހު، ރޮޑްރިގޭޒްގެ މޮޅު ކުޅުމެއް ވަނީ އެންމެ ފަހުން އެމެރިކާގައި ބޭއްވި ކޮޕައެމެރިކާގައި ފެނިފައެވެ. އެގޮތުން މުޅި މުބާރާތުގައި އެއް ގޯލާއި ހަ އެސިސްޓު ކޮށްދިން އިރު، އޭނާގެ ކޮލަމްބިއާ ވަނީ ފައިނަލުގައި ވެސް ކުޅެފައެވެ.

ރޮޑްރިގޭޒްގެ ސީނިއަރ ކެރިއަރު ފެށީ ކޮލަމްބިއާގެ އެންވިގާޑޯއިންނެވެ. އެ ކުލަބަށް ދެ އަހަރު ކުޅުމަށްފަހު އޭނާ ބަދަލުވީ އާޖެންޓީނާގެ ބެންފީލްޑަށެވެ. އެންމެ ފުރަތަމަ ޔޫރަޕްގެ ޓީމަކަށް އޭނާ ކުޅުނީ 2010 ގެ ވޯލްޑް ކަޕަށް ފަހު، ޕޯޗުގަލްގެ ޕޯޓޯއަށެވެ. އޭގެ ފަހުން ރެއާލް މެޑްރިޑަށް އޭނާ ބަދަލުވީ ފްރާންސްގެ މޮނާކޯއަށް ކުޅުމަށްފަހުއެވެ. ރެއާލް މެޑްރިޑުގެ ކޮންޓްރެކްޓް މުއްދަތުގައި އޭނާ ވަނީ ލޯނެއްގައި ބެޔާން މިއުނިކަށް ވެސް ކުޅެފައެވެ.

ސްޕެއިން އާއި ޖަރުމަނު ލީގުގައި ކުޅުމަށް ފަހު ރޮޑްރިގޭޒް ވަނީ އިންގްލިޝް ޕްރިމިއަރ ލީގުގެ އެވަޓަންއަށް ވެސް ކުޅެފައެވެ. އަދި އޭގެ ފަހުން ގަތަރުގެ އަލް-ރައްޔާންއަށް ކުޅުމަށްފަހު، ބްރެޒިލްއަށް ބަދަލުވުމުގެ ކުރިން އޭނާ ވަނީ ގްރީސްގެ އޮލިމްޕިއާކޯސްއަށް ވެސް ކުޅެފައެވެ.

ރޮޑްރިގޭޒް އޭނާގެ މުޅި ކެރިއަރުގައި މިހާތަނަށް އެންމެ ގިނަ މެޗު ކުޅެދީފައިވަނީ ރިއާލް މެޑްރިޑަށެވެ. އެ ކްލަބަށް 85 މެޗު ކުޅެދިން އިރު 29 ގޯލު ވަނީ ކާމިޔާބުކޮށްފައެވެ.