ނުރަސްމީ ދަތުރުފުޅެއްގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު، މިރޭ ސިންގަޕޫރަށް ފުރާވަޑައިގެންފިއެވެ.

މިއީ ރައީސުލްޖުމްހޫރިއްޔާގެ ނުރަސްމީ ދަތުރުފުޅަކަށްވާތީ އެދަތުރުފުޅާއި ގުޅޭ މައުލޫމާތު ރައީސުލްޖުމްހޫރިއްޔާގެ އޮފީހުން ހާމައެއް ނުކުރައްވައެވެ. އެހެން ނަމަވެސް މިރޭ ރައީސް ވަނީ ޕީއެންސީގެ ޖަގަހަ ޖަލްސާގައި ބައިވެރިވެވަޑައިގެން ދެއްކެވި ވާހަކަފުޅުގައި މިރޭ ސިންގަޕޫރަށް ފުރާވަޑައިގަންނަވާ ވާހަކަފުޅުވެސް ވިދާޅުވިއެވެ.

މީގެ އިތުރުން މިރޭގެ ޖަލްސާގައި އެމަނިކުފާނު ވަނީ، އެމަނިކުފާނުގެ ޞިއްޙީ ޙާލުކޮޅާއި ގުޅޭ ގޮތުން މިދެތިން ދުވަހު ސޯޝަލްމީޑިއާގައި ފެތުރި ވާހަކަފުޅާއި ގުޅޭ ގޮތުންވެސް ވާހަކަފުޅު ދައްކަވާފައެވެ. ރައީސް ފާޚާނާއަށް ވެއްޓިވަޑައިގެން އަނިޔާވީކަމަށް ސޯޝަލް މީޑިއާގައި ވާހަކަ ފެތުރި ނަމަވެސް މިރޭ އެމަނިކުފާނު ވިދާޅުވީ، މީގެ ދެތިން ރެއެއް ކުރިން އެމަނިކުފާނު އާރަށުގައި ފުޓުބޯޅަ ކުޅުއްވަނިކޮށް އަނިޔާވި ކަމަށާއި، އިންދިރާގާނދީ މެމޯރިއަލް ހޮސްޕިޓަލުގައި ފަރުވާ ހޯއްދެވީ އެކަމާއި ގުޅިގެން ކަމަށެވެ. 

އަދި ސިންގަޕޫރަށް ފުރާވަޑައިގަންނަވަނީ އެރޭ ފުޓުބޯޅަ ކުޅުއްވަނިކޮށް ލިބުނު އަނިޔާއާ ގުޅިގެންނާއި މީގެ ދެ އަހަރެންހާ ދުވަސްކުރިން ކުރެއްވި ސާޖަރީގެ ފޮލޯއަޕަށް ކަމުގައިވެސް އެމަނިކުފާނު ވަނީ ވިދާޅުވެފައެވެ.

ފަރުވާއަށްފަހު ރައީސުލްޖުމްހޫރިއްޔާގެ ދެކަނބަލުން މާލެ ވަޑައިގަންނަވާނެ ދުވަހެއް ހާމަކުރައްވާފަައެއް ނުވެއެވެ.