ފުރިހަމަ ޑްރޯން ޝޯއަކާ ހަވާއެރުމާއެކު ސްޓޭޖް ޝޯ އާއެކު މިނިވަން އުފާ ކާނިވާ ރޭފަށައިފިއެވެ.

ރޭ ބޭއްވި ރަސްމިއްޔާތުގައި ކާނިވާ ހުޅުއްވައި ދެއްވީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. އެމަނިކުފާނުގެ އަރިހުގައި އަނބިކަނބަލުން ފަޒްނާ އަޙްމަދުވެސް ބައިވެރިވެވަޑައިގެންނެވިއެވެ.

ރެއަށް ޚާއްސަކޮށްގެން ކުރިޔަށް ގެންދިޔަ ކުޅިވަރު ތަކުގެ ތެރޭގައި ޑްރޯން ޝޯ އާ ހަވާއެރުވުން ހިމެނެއެވެ.

ރޭ ކުރިޔަށް ގެންދިޔުމަށް ހަމަޖެއްސި ރެޑްބުލް ޕެރަމޮޓޯ ހަރަކާތްތައް ވަނީ މޫސުމް ތަން ނުދިނުމުގެ ސަބަބުން ފަސްކޮށްފައެވެ. އަދި ޕެރަމޮޓޯ ހަރަކާތްތައް މިއަދު ނުވަތަ މޫސުމް ތަންދިންހާ އަވަހަކަށް ކުރިޔަށް ގެންދިޔުމަށް ވަނީ ނިންމާފައެވެ.

މިނިވަން އުފާ ކާނިވަލްގައި ކޮންމެ ދުވަހަކު ހިމެނޭ ހަރަކާތްތަކުގެ ތެރޭގައި ކުޅިވަރު ސްޓޯލްތައް, ފުޑް ސްޓޯލްތަކާއި ތަފާތު ކުޅިވަރު ގޭމްތައް ހިމެެނެއެެވެ. ކާނިވަލުގައި ރާއްޖޭނެ ބޭރުގެ ޕާފޯމަންސަރުން, ދިވެހި ފަންނާނުން, ދިގުދަނޑި ހިނގުން, އެކްރޮބެޓްސް, ޖަގްލަރސް, ބިރުވެރި ހޮހޮޅަ, ކަރޯކޭ ބޮކްސް, ފްލޯޓް ޕާރކް, ލެއިޒަރ ޕާރކް, ހަރަކާތްތައް ކުރިޔަށް ގެންދާނެއެވެ.

މީގެ އިތުރުން ކާނިވަލަށް ޒިޔާރަތްކުރާ ފަރާތްތަކުގެ ތެރެއިން ގުރުއަތުން ހޮވޭ ފަރާތަކަށް އިތުރު މީހަކާއެކު އިންޑޮނޭޝިޔާގެ ބާލީއަށް 7 ދުވަހުގެ ޗުއްޓީ ދަތުރެއް ލިބޭނެއެވެ.

މިކާނިވާ ކުރިއަށް ގެންދަނީ ހޯމް މިނިސްޓްރީއާ އާބަންކޯ ގުޅިގެންނެވެ. ކާނިވަލްގެ ޕާޓްނަރުންގެ ތެރޭގައި ދިރާގު, އެސްޓީއޯ, ސްޓެލްކޯ, އެމްޑަބްލިޔުއެސްސީ, އުރީދޫ ހިމެނެއެވެ.