އިނގިރޭސީ ގައުމީ ޓީމުގެ ކޯޗެއްގެ މަގާމުގައި ފަސް އަހަރު ހޭދަކޮށްފައިވާ ސްވިޑްންގެ ސްވެން ގޮރަން އެރިކްސަން ކެންސަރު ބަލީގައި ހޯމަ ދުވަހު މަރުވެއްޖެއެވެ.

ފުރަމޭގެ ކެންސަރަށް ފަރުވާ ހޯދަމުން ދިޔަ އެރިކްސެންއަށް ކެންސަރު ޖެހިފައިވާކަން އެނގުނީ މީގެ އަހަރެއްހާ ދުވަސް ކުރިންނެވެ. އަދި އޭނާ މަރުވި އިރު އުމުރަކީ 76 އަހަރެވެ.

އިނގިރޭސި ގައުމީ ޓީމުގައި އެނާ ހޭދަކުރި މުއްދަތުގައި 3 ކުއާޓާ ފައިނަލުގައި ވާދަކޮށްފައިވެއެވެ. މިއީ ގައުމުން ބޭރު ކޯޗަކަށް މިފަދަ ކާމިޔާބެއް ހޯދުނު ފުރަތަމަ ފަހަރެވެ. އޭނާ އިންގްލެނޑުގެ ގައުމީ ޓީމުގެ ވަޒީފާގައި ހޭދަކޮށްފައިވަނީ 2001 އިން 2006 އަށެވެ.

އެރިކްސަން 12 ކްލަބަށް ކޯޗު ކޮށްދީފައިވާ  އިރު، 18 ތަށި ހޯދައިފަ ވެއެވެ. އެރިކްސަން، ކޯޗުކޮށްދިން ކްލަބްތަކުގެ ތެރޭގައި، މެންޗެސްޓާ ސިޓީ، ލާޒިއޯ، ރޯމާ އަދި ލެސްޓާ ސިޓީ ހިމެނެ އެވެ. ގައުމީ ޓީމުތަކަށް ބަލާއިރު، އިންގްލެންޑްގެ އިތުރުން، ފިލިޕީންސް، މެކްސިކޯ އަދި އައިވަރީ ކޯސްޓަށް ކޯޗުކޮށްދީފައިވެ އެވެ.

އުމުރުން 27 އަހަރުގައި ކުޅުމުން ރިޓަޔާކުރި، އެރިކްސަންގެ ކޯޗިން ކެރިއަރު 42 އަހަރަށް ދިގުދެމިގެންދިޔައެވެ. ސްވިޑެންގެ ޑެގެފޯސް އާއި ގޮތެންބާގް އަށް ކޯޗުކޮށްދިން އެރިކްސަން ވަނީ އިޓަލީ ލީގުގައި ފިއޮރެންޓީނާ، ލާޒިއޯ، ސަމްޕްޑޯރިއާ އަދި ރޯމާ އަށް ކޯޗުކޮށްދީފައެވެ. އިނގިރޭސި ޕްރިމިއާ ލީގުގައި މެންޗެސްޓާ ސިޓީ އާއި ލެސްޓާ ސިޓީ އަށް އިރުޝާދުދިން އެރިކްސަން ވަނީ ޕޯޗުގަލްގެ ބެންފީކާ އަށް ވެސް އިރުޝާދުދީފައެވެ.