ކާބޯތަކެތީގެ ރައްކާތެރިކަމުގެ ޤާނޫނަށް ޢަމަލުކުރަން ފެށުމުގެ ކުރިން، މޯލްޑވްސް ފުޑް އެންޑް ޑްރަގް އޮތޯރިޓީގައި ނުވަތަ ދައުލަތުގެ އެހެން އިދާރާއެއްގައި ރަޖިސްޓްރީކޮށްފައިވާ ކާބޯތަކެތީގެ ޚިދުމަތްދޭ ތަންތަނާއި، ފަރާތްތަކަށް ދޫކޮށްފައިވާ ލައިސަންސްތަކުގެ މުއްދަތު އިތުރުކޮށްދީފިއެވެ.

މޯލްޑިވްސް ފުޑް އެންޑް ޑްރަގް އޮތޯރިޓީން މިއަދު ކުރި އިޢުލާނުގައި ބުނެފައި ވަނީ، އެ އޮތޯރިޓީގައި ނުވަތަ ދައުލަތުގެ އެހެން އިދާރާއެއްގައި ރަޖިސްޓްރީކޮށްފައިވާ ކާބޯތަކެތީގެ ޚިދުމަތްދޭ ތަންތަނާއި، ފަރާތްތަކަށް ދޫކޮށްފައިވާ ލައިސަންސް މިއަހަރުގެ ނޮވެމްބަރު މަހުގެ 23 ވަނަ ދުވަހުގެ ނިޔަލަށް އިތުރުކޮށްދީފައިވާ ކަމަށެވެ.

އަދި ކާބޯތަކެތީގެ ޚިދުމަތްދޭ ތަންތަނުގެ ތެރެއިން އަލަށް ލައިސަަންސް ހޯދުމަށް އެދި ހުށައަޅާ ހޮޓާ، ކެފޭ، ރެސްޓޯރަންޓް ފަދަ ތަންތަނުން ޚިދުމަތަށް އެދި ހުށައަޅަންވާނީ، "ވަންގަވް" ޕޯޓަލްގެ ތެރެއިން ކަމަށްވެސް އެއޮތޯރިޓީން ބުނެފައިވެއެވެ. މީގެ އިތުރުން ކާބޯތަކެއްޗާއި، ބޯފެން އުފައްދާ ކާރުޚާނާތައް ރަޖިސްޓްރީ ކުރުމާއި، އާމްދަނީ ހޯދުމަށް ގޭގައި ކާބޯތަކެތި ތައްޔާރުކުރާ ފަރާތްތައް ދަފްތަރުން ކުރިއަށް ގެންދާނީ އެ އޮތޯރިޓީން ޤާއިމްކޮށްފައިވާ އޮންލައިން ޕޯޓަލް "ދިރިތި" މެދުވެރިކޮށް ކަމުގައިވެސް އެ އޮތޯރިޓީން ވަނީ ބުނެފައެވެ.

ކާބޯތަކެތީގެ ރައްކާތެރިކަމުގެ ޤާނޫނު (ޤާނޫނު ނަންބަރު 6/2024)ގެ ދަށުން، "މޯލްޑިވްސް ފުޑް އެންޑް ޑްރަގް އޮތޯރިޓީ"އަށް ލިބިގެން ދިޔަ އައު ބާރު ތަކާއިއެކު  އެޤާނޫނުގެ 8ވަނަ މާއްދާގެ (ހ)ގެ ދަށުން އެއިދާރާ ރައީސުލްޖުމްހޫރިއްޔާ އަލުން ޤާއިމްކުރެއްވީ މި އޮގަސްޓް މަހުގެ 23 ވަނަ ދުވަހުގައެވެ.