ދައުލަތަށް ޚިދުމަތް ކުރެއްވުމަކީ ކޮންމެ ޒުވާނެއްގެ ވެސް އުފަލަކަށް ހެއްދެވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އެދިވަޑައިގެންފިއެވެ. އެމަނިކުފާނު ޒުވާނުންގެ ކިބައިން މިކަމަށް އެދިވަޑައިގެންނެވީ،  ދިވެހި ދައުލަތަށް ދިގު މުއްދަތަކަށް ޚިދުމަތް ކުރައްވާފައިވާ ބޭފުޅުން ކޮށްދެއްވި ޚިދުމަތްތަކުގެ އަގު ވަޒަންކުރައްވައި އިނާމް ދެއްވުމަށް މިއަދު ބޭއްވި ޖަލްސާގައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، މިއަދުގެ ޒުވާނުންނަށް އެމަނިކުފާނު ދަންނަވާލަން އޮތީ، ދައުލަތަށް ޚިދުމަތް ކުރެއްވުމަކީ ކޮންމެ ޒުވާނެއްގެ ވެސް އުފަލަކަށް ހެއްދެވުމަށާ، އޮފީހަށް ވަޑައިގެންނެވުމަކީ ހަމައެކަނި ވަޒީފާއެއް ކަމުގައި ނުހެއްދެވުމަށް ކަމަށެވެ. އަދި ޒުވާނުންނާއި ހަވާލުވެފައި ވަނީ، ޤައުމީ ތަރައްޤީގެ ވަރަށް މުހިންމު ޒިންމާތަކެއް ކަމަށާއި އެއީ ވަރަށް މަތިވެރި ޤައުމީ ވާޖިބެއް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

މީގެ އިތުރުން ރައީސުލްޖުމްހޫރިއްޔާ ވިދާޅުވީ، އވާޖިބުތައް އަދާކުރެއްވުމުގައި، ހިތުގެ އެންމެ އިޚްލާޞްތެރިކަމާއެކު، ވަފާތެރިކަންމަތީ ދެމިތިއްބެވުމަށް ދައުލަތުގެ ހުރިހާ މުވައްޒަފުންނަށް، ވަކިން ޚާއްޞަކޮށް، ދިވެހި ޒުވާނުންނަށް އެމަނިކުފާނު އިލްތިމާސްކުރައްވާ ކަމަށެވެ. އަދި މަސައްކަތަށް ވަގުތު ދެއްވައިގެން، ކެތްތެރިކަމާއި ތެދުވެރިކަމާއެކު، ކަމަށް ކަމޭހިއްތަވައިގެން ވަޒީފާ އަދާކުރެއްވުމުގައި ދެމިތިއްބަވާނޭ ކަމުގައި އުއްމީދު ކުރައްވާކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ދިވެހި ދައުލަތަށް ދިގު މުއްދަތަކަށް ޚިދުމަތް ކުރެއްވި ބޭފުޅުންގެ ޚިދުމަތުގެ އަގު ވަޒަންކުރައްވައި، 148 ބޭފުޅަކަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، މިއަދު ވަނީ ޝަރަފުގެ ބެޖާއި އައްޑަނަ އަރުވާފައެވެ. އޭގެ ތެރޭގައި ދިވެހި ދައުލަތަށް 45 އަހަރަށް ވުރެ ގިނަ ދުވަހު ޚިދުަމަތްކޮށްދެއްވި 48 ފަރާތެއްވެސް ހިމެނެއެވެ.