މީގެ 10 އަހަރު ކުރިން، ވަގަށް ނަގައި މަރާލާފާއިވާ، މިނިވަން ނޫހުގެ ނޫސްވެރިޔާ އަޙްމަދު ރިޟުވާން ޢަބުދުﷲގެ ބައްޕަ، ހއ، ދިއްދޫ، ސީނިއަސުރުމާގޭ، ޢަބުދުﷲ މޫސާ މިރޭ ނިޔާވެއްޖެއެވެ.

ޢަބްދުﷲ މޫސާ ނިޔާވީ، ގިނަ ދުވަސްތަކަކު ބަލިވެ އުޅުމަށްފަހުގައި، މިރޭ އިރާކޮޅު އިންދިރާގާނދީ މެމޯރިއަލް ހޮސްޕިޓަލުގައެވެ. މާލޭ ލޯކަލް މާރުކޭޓުގައި ގޮޅިއެއްވެސް ހިންގި ޢަބުދުﷲ މޫސާއަކީ، ބާޒާރުމަތީގައި ގިނަ ދުވަސްތަކެއް ވަންދެން ވިޔަފާރިކުރި މީހެކެވެ.

ޢަބްދުﷲ މޫސާ ގެ ދަރިފުޅު، މިނިވަން ނޫހުގެ ނޫސްވެރިޔާ، އަޙްމަދު ރިޟުވާންއަށް ވީގޮތެއް ހޯދުމަށް ފާއިތުވި 10 އަހަރުގެ ތެރޭގައި ގިނަ މަސައްކަތްތަކެއް ކުރެއްވިއެވެ.

ޢަބްދުﷲ މޫސާގެ އާއިލާއިން މައުލޫމާތު ދީފައިވާ ގޮތުގައި، ކަށުނަމާދާއި މާދަމާގެ ޢަސުރުނަމާދަށް ފަހުގައި، ބަންޑާރަ މިސްކިތުގައި ބޭއްވޭތޯ ދަނީ މަސައްކަތް ކުރަމުންނެވެ.

ނޫސްވެރިޔާ ރިޟުވާނު ވަގަށް ނަގައި، ކަރުބުރިކޮށްލައިގެން މަރާލައި ހަށިގަނޑު ކަނޑުފެއްތީކަމަށް، މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ބެލުމަށް އުފެއްދި ރިޔާސީ ކޮމިޝަންގެ ތަޙްޤީޤަށްފަހު އެކޮމިޝަނުން ހާމަކޮށްފައިވެއެވެ. އެހެން ނަމަވެސް 10 އަހަރުވީ އެޤަޠުލަށް އިންސާފު ނުލިބި، ރިޟުވާނުގެ ބައްޕަ މިއަދު ވަނީ ދުނިޔެެއާ ވަކިވެފައެވެ.