ބޭންކް އޮފް މޯލްޑިވްސްގެ ރުފިޔާ ކާޑުތަކުން ރާއްޖޭން ބޭރުން ވިޔަފާރި ނުކުރެވޭ ގޮތް ހަދައި، މިހާރު ދޫކޮށްފައިވާ ސްޓޭންޑަރޑް އަދި ގޯލްޑް ކްރެޑިޓް ކާޑުތަކުގެ ލިމިޓް 100 ޑޮލަރަށް ދަށްކޮށްފިއެވެ.

ބޭންކް އޮފް މޯލްޑިވްސްއިން މިއަދު ނެރުނު ބަޔާނުގައި ބުނީ، އެބަދަލުތަކަށް މިހިނދުން ފެށިގެން އަމަލު ކުރުމަށް ނިންމާފައިވާ ކަމަށެވެ. އެބަދަލުތައް ގެނެސްފައި ވަނީ، ކާޑުން ކުރެވޭ ބޭރުގެ މުޢާމަލާތްތަކުގެ އަދަދު ދުވަހުން ދުވަހަށް އިތުރުވަމުން ދިޔަ ނަމަވެސް ބޭންކަން ގަންނަން ލިބޭ ބޭރު ފައިސާގެ އަދަދު އެއް މިންވަރެއްގައި ހިފެހެއްޓިފައިވާތީ ކަމުގައި ބޭންކް އޮފް މޯލްޑިވްސްއިން ވަނީ ބުނެފައެވެ.

އެކުންފުނިން ގެނައި ބަދަލުތައް:

މިހާރު ދޫކޮށްފައިވާ ޑެބިޓް ކާޑުތައް: 

- ކާޑުގެ ޕްރައިމަރީ އެކައުންޓަކީ ރުފިޔާ އެކައުންޓެއް ނަމަ، ޑޮލަރުން ދައްކަންޖެހޭ އެއްވެސް ފައިސާއެއް އެކާޑަކުން ނުދެއްކޭނެ.

މިއަދުން ފެށިގެން އަލަށް ދޫކުރާ ޑެބިޓް އަދި ކްރެޑިޓް ކާޑުތައް: 

- ކާޑުގެ ޕްރައިމަރީ އެކައުންޓަކީ ރުފިޔާ އެކައުންޓެއް ނަމަ، ޑޮލަރުން ދައްކަންޖެހޭ އެއްވެސް ފައިސާއެއް އެކާޑަކުން ނުދެއްކޭނެ.

މިހާރު ދޫކޮށްފައިވާ، ސްޓޭންޑަރޑް އަދި ގޯލްޑް ކްރެޑިޓް ކާޑުތައް:

- މަހެއްގެ މައްޗަށް ލިބޭނީ 100 ޑޮލަރު

ބޭންކް އޮފް މޯލްޑިވްސްއިން ބުނީ މިބަދަލުތައް ގެނައީ ބޭންކަށް ޑޮލަރު ލިބުން ދަތިވެ، ގަންނަން ލިބޭ ޑޮލަރަށް ވުރެ އިތުރަށް ބޭންކުންވެސް ޑޮލަރު ހޭދަ ކުރަން ޖެހުމުގެ ސަބަބުން ކަމަށެވެ. 

މިގެނެވުނު ބަދަލުތަކާއި އެކުވެސް ބީއެމްއެލްގައި ޑޮލަރު އެކައުންޓްތައް ހުޅުވާފައިވާ ކަސްޓަމަރުންނަށް އެފަރާތްތަކުގެ ޑޮލަރު އެކައުންޓް ޕްރައިމަރީ އެކައުންޓްގެ ގޮތުގައި ކާޑާއި ލިންކުކޮށްފައިވާ ކާޑުތަކުން މުއާމަލާތް ކުރެވޭނެއެވެ.