މިދިޔަ އަހަރާ އަލާބަލާއިރު، މި އަހަރުގެ މިހާތަނަށް ޗައިނާއިން އައި ފަތުރުވެރިންގެ އަދަދު ބޮޑު ތަން އިތުރުވެފައިވާކަމަށް، ޓުއަރިޒަމް މިނިސްޓްރީގެ ތަފާތް ހިސާބުތަކުން ދައްކައިފިއެވެ. އެގޮތުން މި އަހަރުގެ މިހާރަތަނަށް ޗައިނާއިން ޒިޔާރަތްކުރި ފަތުރުވެރިންގެ އަދަދު ވަނީ %65 އިތުރުވެފައެވެ.

ޓުއަރިޒަމް މިނިސްޓްރީގެ އެންމެ ފަހުގެ ތަފާސް ހިސާބުތައް ދައްކާގޮތުން، މި މަހުގެ 21 ވަނަ ދުވަހުގެ ނިޔަލަށް ޗައިނާއިން 189،470 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ. ނަމަވެސް މިދިޔަ އަހަރުގެ މި މުއްދަތާ ހިސާބަށް  ޗައިނާއިން ރާއްޖެއަށް ޒިޔާރަތްކުރީ 114،413 ފަތުރުވެރިންނެވެ.

ކޮވިޑު-19 އަށްފަހު ޗައިނާއިން ގެންގުޅުނު ސިޔާސަތުތަކާ ގުޅިގެން، ޗައިނާ މީހުން ދުނިޔޭގައި ދަތުރު ކުރުމުގެ މިންވަރު ހަމައެއްކޮށްހެން ދަށްވެގެން ދިޔައެވެ. ނަމަވެސް، އޭގެ ފަހުން އެ އަދަދު އިތުރުވާން ފަށައި، މިދިޔަ އަހަރު ނިމުނުއިރު ޗައިނާއަކީ ރާއްޖެއަށް ތިންވަނައަށް އެންމެ ގިނައިން ފަތުރުވެރިން އައިސްފައިވާ ޤައުމެވެ. އެގޮތުން މިދިޔަ އަހަރު އެޤައުމުން ރާއްޖެއަށް ވަނީ 187،118 ފަތުރުވެރިން ޒިޔާރަތްކޮށްފައެވެ. 

ޓުއަރިޒަމް މިނިސްޓްރީގެ އެންމެފަހުގެ ތަފާސް ހިސާބުތައް ދައްކާގޮތުން، މި އަހަރުގެ މިހާތަނަށް ރާއްޖެއަށް ވަނީ 1.3 މިލިޔަން ފަތުރުވެރިން ޒިޔާރަތްކޮށްފައެވެ. މި އަދަދަކީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވާ 1.1 މިލިޔަން ފަތުރުވެރިންނާއި އަޅާ ބަލާއިރު %10.5 އިތުރު އަދަދެކެވެ.