މާލޭގައި އިއްޔެއާ ރޭ އާދަޔާ ޚިލާފަށް ބޭރަށް ހިންގުން އިތުރުވިކަމަށް ފާހަގަކުރެވުމާއި އެކު ފަސްކުރި މިނިވަން އުފާ ކާނިވާ މިރޭ ހުޅުވުމަށް ނިންމައިފިއެވެ.

މިނިވަން އުފާ ކާނިވާ ހުޅުވުމަށް ހަމަޖައްސާފައި ވަނީ މިރޭގެ 8 ޖަހާއިރުގައެވެ. އެޗްޑީސީން ބުނީ، ކާނިވާ މިރެއިން ފެށިގެން 6 ރޭގެ މުއްދަތަށް ކުރިޔަށްދާނެ ކަމަށެވެ. ރޯގާ އާއި ގުޅިގެން އެއްރޭ ކާނިވާ ހުޅުވުން ފަސްކޮށް، މިރޭ އަލުން ހުޅުވާއިރު ކާނިވަލަށް ޒިޔާރަތްކުރާ ފަރާތްތަކުން އާއްމު ސާފުތާހިރުކަމަށް ސަމާލުކަން ދެއްވުމަށާއި ބަލިވެ އުޅޭ ނަމަ ކާނިވަލަށް ޒިޔާރަތް ނުކުރެއްވުމަށް،  އާބަންކޯ އާއި މިނިސްޓްރީ އޮފް ހޯމް އެފެއާޒުން ވަނީ އެދިވަޑައިގެންފައެވެ. 

މިރޭ ކާނިވާ ހުޅުވާއިރު ކުރިޔަށް ގެންދާ ޚާއްޞަ ހަރަކާތްތަކުގެ ތެރޭގައި، ޕެރަމޮޓޯ ހަރަކާތްތަކާއި، ޑްރޯން ޝޯ އަދި ހަވާއެރުވުން ހިމެނެއެވެ.

މިނިސްޓްރީ އޮފް ހޯމް އެފެއާޒުން ހާމަކުރައްވާފައިވާ ގޮތުގައި މިރޭ، މިނިވަން އުފާ ކާނިވާ ހުޅުއްވައި ދެއްވާނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ.

އެމްއެންޑީއެފުން ހާމަކޮށްފައިވާ ގޮތުގައި މިރޭ ހަވާއަރުވާނީ، 9:30 ގައެވެ. 

މިނިވަންދުވަހުގެ މުނާޞަބަތާއި ގުޅުވައިގެން ކުރިޔަށްގެންދާ މިނިވަން އުފާ ކާނިވާ މިރޭ ހުޅުވާއިރި، މިއަދު ހަވީރު ސެންޓްރަލް ޕާކުގައި ވަނީ، ފުޅަނދުތައްވެސް ދައްކާލާފައެވެ. ފުޅަނދުތައް ބަލާލުމަށް ގިނަ އަދަދެއްގެ ބަޔަކު ވަނީ މިއަދު ހަވީރު ސެންތްރަލް ޕާކަށް ގޮސްފައެވެ.