"ރިޓްޒް ބިއުޓީ ސެލޫން" ގެ ނަމުގައި މާލޭގައި, ފުޅާދާއިރާއެއްގައި ބިއުޓީ ސެލޫންގެ ވިޔަފާރިކުރަމުން އައި ރަޖަނީ ޝްރެސްތާ ރާއްޖެއިން ޑީޕޯޓްކޮށްލައިފިއެވެ.

މޯލްޑިވްސް އިމިގްރޭޝަނުން ވިދާޅުވީ، އޭނާ އާއި ގުޅޭގޮތުން "އިމިގްރޭޝަން ވޮޗް" އަށް ލިބިފައިވާ ރިޕޯޓަކާއި ގުޅިގެން، 2024 އޮގަސްޓު 11 ވަނަ ދުވަހު ވަނީ ހާއްސަ އިންސްޕެކްޝަނެއް ހިންގާފައި ކަމަށެވެ.

އެގޮތުން ރަޖަނީ ޝްރެސްތާކީ އޭނައަށް ދޫކޮށްފައިވާ ހުއްދައިގެ (ވިސާގެ) ބޭރުން ގަވާއިދާ ހިލާފަށް ވިޔަފާރިކުރަމުން ދިއަ ފަރާތެއްކަން ވަނީ އެނގިފައި ކަމުގައިވެސް އިމިގްރޭޝަނުން ވިދާޅުވިއެވެ. އަދި އޭނާ ވަޒީފާ ދީގެން ގެންގުޅެމުން ދިޔަ، 04 ބިދޭސީ މުވައްޒަފުންގެ ޞައްޙަ ވިސާއެއް ނެތުމުގެ ސަބަބުން، އިމިގްރޭޝަން ބެލުމުގެ ދަށަށް ގެނެސް، 2024 އޮގަސްޓު 13 ވަނަ ދުވަހު އެމީހުންވެސް ވަނީ ރާއްޖެ އަނބުރާ ނާދެވޭ ގޮތަށް ޑީޕޯޓުކޮށްފައި ކަމުގައި މޯލްޑިވްސް އިމިގްރޭޝަނުން ވިދާޅުވެފައިވެއެވެ.

ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންގެ މައްސަލަ ހައްލު ކުރުމުގެ ގޮތުން މިސަރުކާރުން ގެންދަނީ ހަރުކަށި ފިޔަވަޅުތައް އަޅަމުންނެވެ. މިގޮތުން އެންމެ އިސްކަމެއް ދީގެން ކުރަމުން އަންނަ ކަމަކީ، ޤަވާއިދާއި ޚިލާފަށް ވިޔަފާރިތައް ކުރަމުން އަން ބިދޭސީން ހޯދައި އެމީހުންގެ ވިޔަފާރިތައް ހުއްޓުވައި ޑީޕޯޓް ކުރުމެވެ.