ކ. ތުލުސްދޫގައި ކުރިއަށްދިޔަ އޭޝިއަން ސާފިން ޗެމްޕިއަންޝިޕުގައި ރާއްޖޭގެ ފިރހެން ޓީމުގެ ނަތީޖާ ރަގަޅުވުމާއެކު، 2026 ވަނަ އަހަރު ޖަޕާނުގައި ބޭއްވުމަށް ހަމަޖެހިފައިވާ އޭޝިއަން ގޭމްސްގެ ސާފިންގެ ފިރިހެން ކެޓަގަރީގެ ސްލޮޓް ރާއްޖެ އަށް ކަށަވަރުވެއްޖެއެވެ.

އޭޝިއަން ސާފިން ޗެމްޕިއަންޝިޕުގައި ދެކުނު އޭޝިއާގެ އެއް ވަނަ ރާއްޖެއަށް ލިބިފައިވާއިރު، މުޅި އޭޝިއާ ސަރަހައްދުގެ ހަތަރު ވަނަ ވަނީ ރާއްޖެއަށް ކަށަވަރުވެފައެވެ.

މި މުބާރާތުގައި ރާއްޖޭގެ ހޫދު އަހުމަދު (ހޫބްސް) ވަނީ ކުއާޓާ ފައިނަލުގައި ވާދަކޮށްފައެވެ. ކުއާޓާ ފައިނަލުގައި  ހޫދު ވަނީ  9.10 ސްކޯކޮށްފައެވެ. އަދި އޭޝިއަން ގޭމްސްގެ ޖާގަ ރާއްޖެއަށް ކަށަވަރުވީ، ކުއާޓާގެ ދެވަނަ ހީޓުގައި އިންޑިއާގެ މުތޫ އަށް 6.76 ގެ ސްކޯ އަކުން ތިންވަނައަށް ދިޔުމުންނެވެ.

ޖަޕާނުގައި 2026 ވަނަ އަހަރު އޮންނަ އޭޝިއަން ގޭމްސް އަކީ ސާފިން އިވެންޓް ހިމެނޭ ފުރަތަމަ އޭޝިއަން ގޭމްސްއެވެ. އެ ތާރީހީ ގޭމްސްގެ އަންހެން އަދި ފިރިހެން ކެޓަގަރީގެ ސްލޮޓް ރާއްޖެއަށް ކަށަވަރުވެފައިވާއިރު، އެ ގޭމްސް އަށް ދާނެ އެތުލީޓުން ނިންމާނީ ސާފިން އެސޯސިއޭޝަން އޮފް މޯލްޑިވްސް އިންނެވެ.