ކުރީ ސަރުކާރުން ހިންގި ބިންވެރިޔާ ސްކީމްގެ ދަށުން ދޫކުރި ގޯތިތަކާއި، ގެދޮރުވެރިޔާ ސްކީމްގެ ދަށުން ދޫކުރި ފްލެޓްތައް ހަވާލުކުރުން ސަރުކާރުން ލަސް ކުރަމުންދާތީ އެ ގޯއްޗާއި ފްލެޓްތައް ލިބުނު މީހުންގެ ތެރެއިން ބައެއް ފަރާތްތަކުން މުޒާހަރާއަށް ނުކުމެއްޖެއެވެ.

މިގޮތުން، ގޯއްޗާއި ފްލެޓް ލިބިފައިވާ މާލޭގެ ރަށްވެހިންވަނީ މިރޭ މާލޭ ލޮނު ޒިޔާރަތްކޮޅު ރާޅު ގަނޑު ސަރަހައްދަށް އެއްވެ މުޒާހަރާކޮށްފައެވެ. އެފަރާތްތަކުން ގޮވާލާފައި ވަނީ، ގޯއްޗާއި ފްލެޓްތައް ދިނުން އަވަސްކުރުމަށެވެ. އަދި ނުހިއްކާ އޮތް ބިންތައް ހިއްކުމުގެ މަސައްކަތްތައް އަވަސްކުރުމަށްވެސް އެފަރާތްތަކުން ދަނީ ގޮވާލަމުންނެވެ. 

މުޒާހަރާގެ ތެރެއިން -- ފޮޓޯ: ނޫން. އެމްވީ

ބިންވެރިޔާ ސްކީމްގެ ދަށުން، ކުރީ ސަރުކާރުން ހުޅުމާލެ އާއި ގުޅީފަޅު އަދި ގިރާވަރު ފަޅުން ޖުމުލަ 9003 ގޯތި ދޫކުރިއެވެ. އެގޮތުން ހުޅުމާލެއިން 1351 ގޯއްޗާއި ގުޅީފަޅުން 2219 ގޯތީގެ އިތުރުން ގިރާވަރުފަޅުން ދޫކުރާ 5433 ގޯތި ލިބޭ ފަރާތްތަކަށް ކަނޑައަޅައި އެފަރާތްތަކަށް ގޯތި ލިބުނު ކަމުގެ ލިޔުމާއި ރެޖިސްޓްރީ ހަވާލުކޮށް، ބިން ކަނޑައި ދިނުމުގެ މަސައްކަތް ސަރުކާރު ބަދަލުވުމާއި ހަމައަށް ކުރިޔަށް ގެންދިޔައެވެ.