"މޯލްޑިވްސް ފުޑް އެންޑް ޑްރަގް އޮތޯރިޓީ" އުވައިލައްވައި އެ އޮތޯރިޓީ އަލުން ޤާއިމް ކުރެއްވުމަކީ، ރައީސުލްޖުމްހޫރިއްޔާ އަލުން ކުރައްވަން ޖެހިވަޑައިގަންނަވާ ކަމެއް ނޫން ކަމުގައި، ޤާނޫނީ ވަކީލު، އަޙްމަދު މަޢުރޫފް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގެ ލީގަލް ޑިޕާޓްމަންޓްގައި މީގެ ކުރިން މަސައްކަތް ކުރައްވާފައިވާ ވަކީލު މައުރޫފް ވިދާޅުވީ، 

މި ފަހަރު ރައީސުލްޖުމްހޫރިއްޔާ ކުރައްވައިފައި މި އޮތީ ބޭކާރު ކަމެއް ކަމަށާއި، އެ ކަންކަން އޮންނަގޮތް ރަނގަޅަށް ރައީސަށް ދަންނަވައިދޭނެ މީހުން އަރިހުގައި ނެތީތޯ ނުވަތަ، ހުސް ވަގުތު ގިނަކަމުން މިކަހަލަ ބޭކާރު ކަންކަން ރައީސަށް ކުރެއްވެނީތޯވެސް މައުރޫފު ވަނީ ސުވާލު އުފައްދަވާފައެވެ.

މައުރޫފް ވިދާޅުވީ، މިއަދު (އޮގަސްޓު 23 ވަނަ ދުވަހު) ޢަމަލުކުރަން ފެށުނު ޤާނޫނު ނަންބަރު 6/2024 (ކާބޯތަކެތީގެ ރައްކާތެރިކަމުގެ ޤާނޫނު) ގެ 8 ވަނަ މާއްދާގެ (ހ) ގައި ބަޔާންކުރަނީ، "މި ޤާނޫނަށް ޢަމަލުކުރަން ފެށުމާއެކު "މޯލްޑިވްސް ފުޑް އެންޑް ޑްރަގް އޮތޯރިޓީ" ގެ ނަމުގައި ސަރުކާރުގެ އިދާރާއެއް އުފެދުނީއެވެ" މިހެން ކަމަށެވެ. 

އޭގެ މާނައަކީ، ޤާނޫނަށް ޢަމަލުކުރަން ފެށުމާއެކު، ޤާނޫނުގެ ޒަރީއާއިން އިދާރާ ޤާއިމުވީ ކަމަށާއި، އަލުން ޤާއިމުކުރަން ނުޖެހޭ ކަމުގައިވެސް މައުރޫފް ވިދާޅުވިއެވެ. އަދި ޤާނޫނުގައި ބަޔާންކޮށްފައިވާ ގޮތުން، ކުރިން ހިނގަމުން އައި އިދާރާ ޤާނޫނީގޮތުން އުވުނީ ކަމަށާއި ރައީސުލްޖުމްހޫރިއްޔާ އެ އޮތޯރިޓީ އުވައިލާންވެސް ނުޖެހޭނެ ކަމުގައި މައުރޫފް ވިދާޅުވިއެވެ. އަދި މުދަލާއި، ވަސީލަތްތަކާއި ބަޖެޓާއި މުވައްޒަފުންވެސް އައު އިދާރާގެ ދަށަށް ބަދަލުވާނެކަން މައުރޫފް ފާހަގަކުރެއްވިއެވެ.

މައުރޫފް ވިދާޅުވީ، ސަރުކާރުގެ އިދާރާއެއް/ ޑިޕާޓްމަންޓެއް/ ކޮމިޝަނެއް/ ލަފާދޭ ކައުންސިލެއް ނުވަތަ ބޯޑެއް ރައީސް އުފައްދަވަނީ، ސީދާ ރައީސުލްޖުމްހޫރިއްޔާ އެތަނެއް އުފައްދަންވާނެ ކަމަށް ޤާނޫނުގައި ބަޔާންކޮށް ލާޒިމުކޮށްފައި އޮންނަ ހާލަތުގައި އެކަނި ކަމަށެެވެ. އަދި މިއަދު އަމަލުކުރަން ފެށުނު ޤާނޫނުގައި އޮތީ އެހެން ނޫންކަންވެސް އޭނާ ފާހަގަކުރެއްވިއެވެ.

ރައީސުލްޖުމްހޫރިއްޔާ މިއަދު ވަނީ، މިހާތަނަށް ހިންގަމުން އައި މޯލްޑިވްސް ފުޑް އެންޑް ޑްރަގް އޮތޯރިޓީ އުވާލައްވައި ހަމަ އެނަމުގައި އައު އޮތޯރިޓީއެއް ޤާއިމް ކުރައްވާފައި ކަމުގައި ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވެއެވެ.