މާލޭ ސަރަޙައްދުގައި މިވަގުތު ހަލުވިކަމާއިއެކު ފެތުރެމުންދާ ރޯގާއަކީ ނޯރޯވައިރަސްގެ ރޯގާއެއްކަމާއި، މިއީ ހަލުވިކަމާއިއެކު ފެތުރޭ ވައިރަސްއެއްކަމަށް ހެލްތް ޕްރޮޓެކްޝަން އެޖެންސީ (އެޗް.ޕީ.އޭ.) އިން ބުނެފިއެވެ. އަދި ޙާއްސަކޮށް ބަންދު ތަންތަނުގައާއި ގިނަ މީހުން އެއްވެ ތިބޭ ތަންތާގައި މި ވައިރަސް ވަރަށް ފަސޭހަކޮށް ފެތުރޭކަމަށް އެ އެޖެންސީއިން ހާމަކުރެއެވެ.

ނޯރޯވައިރަސް އަކީ ކޮބާ؟

ނޯރޯވައިރަސްއަކީ ހޮޑުލުމާއި ބޭރުންހިންގުން ފަތުރާ ވައިރަސްއެކެވެ. މި ވައިރަސްއަށް އިނގިރޭސިވިލާތުގައި "ވިންޓަރ ވޮމިޓިންގ ބަގް" އޭ ވެސް ކިޔައިއުޅެއެވެ.  އެއީ މި ބަލި އެ ގައުމުގައި ބޮޑަށް ފެތުރެނީ ފިނި މޫސުމުގައިކަމަށް ވާތީއެވެ. މި ވައިރަސް ހަށިގަނޑަށް ވަނުމަށްފަހު، މިކަމުން ސަލާމަތްވުމަށް އެހާ ގިނަ ދުވަސް ހޭދަ ނުވާކަމަށް ސިއްޙީ މާހިރުން ބުނެއެވެ. އެގޮތުން އާންމު ގޮތެއްގައި ގާތްގަނޑަކަށް ދެ ދުވަސްވަރުތެރޭގައި މި ވައިރަސް ހަށިގަނޑުން ދާކަމަށް ވެސް ވެއެވެ.

އެޗް.ޕީ.އޭ. އިން ވަނީ މި ބަލިން ރައްކާތެރިވާނެ ގޮތްތައް ޙިއްސާ ކޮށްފައެވެ. އެގޮތުން މި ރޯގާ އިން ރައްކާތެރިވުމަށް:

·         ގިނަގިނައިން ސައިބޯނި ލައިގެން އަތް ދޮވުން

·         ހޮޑު ނުވަތަ ބޮޑުކަމުދާ ތަކެތި އެޅިފައިވާ ތަންތަން ސާފުކުރާއިރު ސަމާލުވުން

·         ޓިޝޫ/ޕޭޕަރ ޓަވަލް އިން ސާފުކޮށް، ރައްކާތެރި ގޮތުގައި އުކާލުމަށްފަހު، ބްލީޗް އަޅާފައި 5 މިނެޓް ބެހެއްޓުން، އަދި އެއަށްފަހު ބްލީޗް ސާފު ކުރުމަށްފަހު ސައިބޯނި/ދޮންނަ ސޮލިއުޝަން ލައިގެން ސާފުކުރުން

·         ބަލީގެ އެއްވެސް އަލާމާތެއް ހުރުމަށްފަހު، ބަލީގެ އަލާމާތްތައް ފިލާތާ 24 ގަޑިއިރު ވަންދެން ކާބޯތަކެތި ތައްޔާރު ކުރުމުގައި ބައިވެރިނުވުން

·         މީހުން ގިނަ ތަންތަނަށް ނުދިއުން