ގދ. ގައްދޫގައި ބޭސް ބޭނުންކޮށްގެން ބުޅާ މަރަމުންދާ ކަމަށް ފާހަގަކުރެވިގެން، އެކަމުގެ ސަބަބުން އެ ރަށުގައި ބަލިމަޑުކަމެއް ފެތުރިދާނެކަމަށް ބެލެވޭތީ، އެކަން އެގޮތަށް ނުކުރުމަށް ގައްދޫ ކައުންސިލުން އެދިއްޖެއެވެ.

ގައްދޫ ކައުންސިލުން ނެރުނު ބަޔާނެއްގައި ބުނީ، ބޭސް ބޭނުންކުރުމުގެ ސަބަބުން މަރުވެފައިވާ ބުޅަލާއި ކާޅު ފާއިތުވެ ދިޔަ ހަފްތާގެ ތެރޭގައި ރަށުގެ އެކި ހިސާބުން ފެނިފައިވާ ކަމަށެވެ. އަދި އެކަމުގެ އުނދަގޫ ރައްޔިތުންނަށް ފޯރައި، އެކަމުގެ ޝަކުވާ ކައުންސިލަށް ކޮށްފައިވާކަން ވެސް ވަނީ އެ ބަޔާނުގައި ހާމަކޮށްފައިވެއެވެ.

ކައުންސިލުން މިކަން ހުއްޓާލުމަށް އެދުނީ، ވިއްސާރަ މޫސުމެއްގައި އެގޮތަށް މަގުމަތީގައި މަރުވެފައިވާ ބުޅާތައް ހުރެއްޖެނަމަ، އެއީ ބަލިމަޑުކަމެއް ފެތުރުމުގެ އަސްލަކަށް ވެދާނެކަމަށް ހީވާތީކަމަށް ކައުންސިލުން ހާމަކޮށްފައިވެއެވެ.

ބުޅަލާ ގުޅޭ ބަޔާނެއް ގައްދޫ ކައުންސިލުން ނެރުނު މި ވަގުތުގައި، ބުޅަލުގެ މަސް ބޭނުންކޮށްގެން ކާބޯތަކެތި ތައްޔާރުކޮށްގެން ވިއްކާ ކަމުގެ ބޮޑު މައްސަލައެއްގެ އަޑު މިވަނީ މުޅި ރާއްޖޭގައި ގަދަވެފައެވެ.