ފުޑް ސޭފްޓީ ބިލާއި ގުޅޭ ގޮތުން މަޖިލީހު ކޮމިޓީގައި ދައްކާފައިވާ ވާހަކަތައް ސަރުކާރަށް ތާއީދު ކުރާ ފަރާތްތަކުން ސޯޝަލް މީޑިއާގައި މިހާރު ފަތުރަމުން ދަނީ އޮޅުވާލައިގެން ކަމުގައި އެމްޑީޕީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރ ފައްޔާޒް އިސްމާއީލް ވިދާޅުވެއްޖެއެވެ.

ފައްޔާޒު މިހެން ވިދާޅުވީ، ސަރުކާރަށް ތާއީދު ކުރާ ފަރާތްތަކުން ފަތުރަމުންދާ ވާހަކަތާއި ގުޅިން އެއަށް ރައްދު ދެއްވަމުންނެވެ.

ފައްޔާޒު ވިދާޅުވީ، މިހާރުގެ ސަރުކާރުގެ ފަރާތުން، ދައުރުކުރަމުން ގެންދަނީ، 3 ސެޕްޓެންބަރު 2022 ގައި ބޭއްވުނު މަޖިލީހުގެ އިޖުތިމާއީ ކޮމިޓީގައި ފުޑް ސޭފްޓީ ބިލާބެހޭގޮތުން ދެކެވުނު ވާހަކަތަކުން ތަންކޮޅެއް ކަމަށެވެ. 1 ގަޑިއިރާއި 37 މިނެޓުގެ އެ ބައްދަލުވުމުގެ ވީޑިއޯ މިހާރުވެސް ފެންނަން އެބައޮތްކަން ފައްޔާޒު ވަނީ ފާހަގަކުރައްވާފައެވެ. 

ފައްޔާޒު ވިދާޅުވީ، ކާބޯތަކެތީގެ ރައްކާތެރިކަން ކަށަވަރުކުރުމާއި، ކާބޯތަކެތި ތައްޔާރުކޮށް ވިއްކާ ތަންތަނުގެ ސާފުތާހިރުކަމުގެ މިންގަނޑު ހިފެހެއްޓުމަކީ ވިޔަފާރި ރަޖިސްޓަރީ ކުރުމާއި ގުޅޭ ކަމެއް ނޫން ކަމަށެވެ. އެކަމުގެ ޤާނޫނީ ޒިންމާ ހަވާލުކޮށް ފުރިހަމަ ބާރު އޭރުވެސް މިހާރުވެސް ލިބިދީފައިވާ އިދާރާތަކަށް އެކަން ކުރެވޭނެ ކަމުގައިވެސް ފައްޔާޒު ވިދާޅުވިއެވެ.

ފައްޔާޒު ވިދާޅުވީ، އޭރުވެސް އިކޮނޮމިކް މިނިސްޓްރީން ހުށަހެޅީ، ކާބޯތަކެތީގެ މިންގަނޑު ތަކާއި، އެތަކެތި ތައްޔާރުކޮށް ވިއްކާ ތަންތަނުގައި ހުންނަންޖެހޭ މިންގަނޑުތައް އެމް.އެފް.ޑީއޭ ނުވަތަ އެޗްޕީއޭގެ ގަވާއިދަކުން ކަނޑައަޅައި، އެތަންތަނުން ރެގިއުލޭޓްކޮށް ، މޮނިޓަރކޮށް އަދި ފިޔަވަޅު އެޅުމުގެ ޒިންމާ އަދި ބާރު ޤާނޫނުގައި ކަނޑައެޅުމަށް ކަމުގައި ފައްޔާޒު ވިދާޅުވިއެވެ.

އަދި އެހާ މުހިންމު ކަމެއް، ޤާނޫނު އޮތްގޮތުން ނުކުރެވި އޮތްނަމަ މިވީ 9 މަސް ތެރޭގައި އެކަން ބަދަލު ނުކުރީ ކީއްވެތޯވެސް ފައްޔާޒު ސުވާލު އުފެއްދެވިއެވެ. އަދި ސަރުކާރާއި ޤާނޫނު ހެދުމުގެ ބާރު އޮތީ ބޭނުންފުޅުވާ ކޮންމެ ކަމެއް ކޮށްލެވޭހާ ފަހިކޮށް ކަމަށާއި، ސަރުކާރުން ބޭނުންވީމަ އަލަށް މައްސަލައެއް ހުށަހަޅާފަ އެދުވަހުން އެދުވަހަށް މަޖިލީހުން ކަންކަން ނިންމުމަކީ މިހާރު އާއްމު އުސޫލު ކަމުގައިވެސް ފައްޔާޒު ވަނީ ފާހަގަ ކުރައްވާފައެވެ.

މަޖިލީހުގެ އިޖުތިމާއީ ކޮމިޓީގައި ފުޑް ސޭފްޓީ ބިލާބެހޭގޮތުން އެދުވަހު ފައްޔާޒު ދެއްކެވި ވާހަކަތައް އެބައްދަލުވުމުގައި ބައިވެރިވެވަޑައިގެންނެވި، އެމްއެފްޑީއޭގެ ވެރިއަކަށް ހުންނެވި އަދި މިހާރު ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދުވެސް ވަނީ ޤަބޫލުފުޅު ކުރައްވައި، އެވާހަކަތަކަށް ތާޢީދުކުރައްވާކަން ހާމަކުރައްވައި ވާހަކަފުޅު ދައްކަވާފައެވެ.