އިސްތިއުފާގެ ސިޓީ ނުލިބޭ ކަމަށް ބުނެ ޕީޖީ ހުސައިން ޝަމީމު އިސްތިއުފާ ދެއްވާފައި ވަނިކޮށް މަޤާމުން ވަކިކުރުމުގެ ވޯޓު ނަގައިފިއެވެ.

ޕްރޮސެކިއުޓަރ ޖެނެރަލް ހުސައިން ޝަމީމް މަޤާމުން ވަކިކުރުމަށް މަޖިލީހުގެ ތަޅުމުގައި މަޖިލީހުގެ ނައިބު ރައިސް އަހުމަދު ނާޒިމް ވޯޓަށް އައްސަވާފައި ވަނީ، ރައީސުލްޖުމްހޫރިއްޔާގެ އޮފީހަށް، ޕީޖީގެ އިސްތިއުފާ ސިޓީ ނުލިބޭކަމަށް، މަޖިލީހުގެ ސެކްރެޓޭރިއަޓުން މައުލޫމާތު ދެއްވާފައިވާ ކަމަށް ވިދާޅުވެއެވެ. މަޖިލީހުގެ ތަޅުމުގައި ޕީޖީ ވަކިކުރަން ވޯޓަށް އެހުމުން އެވޯޓުގައި، 75 މެމްބަރުން ބައިވެރިވެވަޑައިގެންނެވިއެވެ. އޭގެ ތެރެއިން 65 މެމްބަރުން ޕީޖީ މަޤާމުން ވަކިކުރުމަށް ވޯޓު ދެއްވި އިރު، ޕީޖީ މަޤާމުން ވަކިކުރަން ނުފެންނަ ކަމަށް 9 މެމްބަރުން ވޯޓު ދެއްވިއެވެ. އަދި ވަކިކޮޅަކަށް ވޯޓު ނުދެއްވައި އެއް މެމްބަރަކު އިންނެވިއެވެ.

ޕްރޮސެކިއުޓަރ ޖެނެރަލް ޙުސައިން ޝަމީމް މަޤާމުން އިސްތިއުފާ ދެއްވައި އެކަން އާއްމު ކުރެއްވީ މަޖިލީހުގެ ޖަލްސާ ފެށުނުތަނާއެވެ. މަޤާމުން އިސްތިއުފާ ދެއްވިކަން ޚުދު އެމަނިކުފާނު، މީޑިއާތަަކަށް ކަށަވަރުކޮށްދެއްވިއެވެ.

ޕީޖީ ހުސައިން ޝަމީމް މަޤާމުން ވަކިކުރަން ހުށައެޅުއްވީ، ހުޅުދޫ ދާއިރާގެ ޕީއެންސީގެ މެމްބަރު މުހައްމަދު ޝާހިދުއެވެ.