ޕްރެސެކިއުޓަރ ޖެނެރަލް ޙުސައިން ޝަމީމް މަޤާމުން އިސްތިއުފާ ދެއްވައިފިއެވެ.

ޕީޖީގެެ މަޤާމުން އެމަނިކުފާނު އިސްތިއުފާ ދެއްވިކަން ނޫން.އެމްވީއަށް އެމަނިކުފާނު ކަށަވަރުކޮށްދެއްވިއެވެ.

ޝަމީމް މަޤާމުން އިސްތިއުފާ ދެއްވީ، އެމަނިކުފާނު މަޤާމުން ވަކިކުރުމުގެ މައްސަލަ ކުރިޔަށް ގެންދިޔުމަށްޓަކައި، ރައްޔިތުންގެ މަޖިލީހުގެ ޚާއްޞަ ޖަލްސާއެއް މިރެއަށް އެޖެންޑާކޮށް އެޖަލްސާ ފަށާފައި ވަނިކޮށެވެ. މިޖަލްސާގެ ރިޔާސަތު ބަލަހައްޓަވަމުން ގެންދަވަނީ، ރައްޔިތުންގެ މަޖިލީހުގެ ނައިބު ރައީސް އަޙްމަދު ނާޒިމެވެ.

ޕީޖީ މަޤާމުން އިސްތިއުފާ ދެއްވައިފިކަން އެމަނިކުފާނު އިޢުލާނު ކުރެއްވި ނަމަވެސް މަޖިލީހުގެ ޖަލްސާގައި ވަނީ، ކޮމިޓީ ރިޕޯޓް އިއްވާފައެވެ.

ޝަމީމް މަޤާމުން ވަކިކުރަން ހުށައެޅުއްވީ، ހުޅުދޫ ދާއިރާގެ ޕީއެންސީގެ މެމްބަރު މުހައްމަދު ޝާހިދުއެވެ.

ޝާހިދު ހުށަހެޅުއްވި މައްސަލާގައި ބުނެފައިވާގޮތުން، ޕީޖީ ޝަމީމް މަސައްކަތް ކުރެއްވުމުގައި ތަފާތު ކުރުން ގެންގުލުއްވާކަމަށް ފާހަގަ ކުރައްވާފައިވެއެވެ. އަދި މީގެ އިތުރުން، އެ މަނިކުފާނު މަސައްކަތް ކުރައްވަމުން ގެންދަވަނީ ވަކި މީހެއްގެ ނުފޫޒުން ކަމަށް ވެސް ފާހަގަކޮށްފައި ވެއެވެ. އެގޮތުން، ޕީޖީގެ ބާރުތައް ބޭނުން ކުރަން ވާނީ ވެސް ވަކި ފަރާތަކަށް މަންފާއެއް ހޯދައި ނުދީ، ޒާތީ ތައައްސަބުން އެއްކިބާވެ ހުރެ ބަންޑާރަ ނައިބު ކަނޑައަޅާފައިވާ މައިގަނޑު ސިޔާސަތުތަކާ އެއްގޮތަށް ކަމަށް ޝާހިދު ވިދާޅުވެފައިވެއެވެ.

ޕީޖީއަށް ތުހުމަތު ކޮށްފައިވާ މައްސަލަތައް:

·      ކުރީގެ ޓޫރިޒަމް މިނިސްޓަރު އަލީ ވަހީދަށް ކޮށްފައިވާ ޖިންސީ ކުށުގެ ދައުވާތައް ފައިލް ކުރުން.

·      މަގާމުގައި ދެމި ހުރުމަށް ކުރީގެ ޔޫތު މިނިސްޓަރު އަހުމަދު މަހުލޫފްގެ މައްސަލަ ފައިލް ކުރުން.

·      ސަފާރީ ރޭޕް ކޭސްގެ މައްސަލާގައި އެމްޑީޕީ އާ ގުޅުން އޮންނަ ފަރާތެއް ހިމެނޭތީ އިސްތިއުނާފް ނުކުރުން.

·      ނިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް ކުރި ހިއުމަން ޓްރެފިކިންގެ ދައުވާ އަނބުރާ ގެންދިޔުން.

·      ބަނގުރަލާ އާ ގުޅޭ 77 މައްސަލައެއް އަނބުރާ ގެންދިޔުން.

·      އެއް ޖިންސުން ގުޅުން ހިންގުމާ ގުޅޭ 13 މައްސަލައެއް އަނބުރާ ގެންދިޔުން.

·      ވެންޓިލޭޓަރު މައްސަލާގައި ދައުވާ ނުކުރަން ނިންމުން.

·      ޕީޖީ އޮފީހުގެ މުއައްޒަފުންނާ މެދުގައި ތަފާތު ކުރުންތައް ގެންގުޅުން.

ޕީޖީ ޙުސައިން ޝަމީމާއި ދެކޮޅަށް ކުރި ތުހުމަތުކަށް އެމަނިކުފާނު މިއަދު ވަނީ، މަޖިލީހުގެ ޖުޑީޝަރީ ކޮމިޓީގައި ޖަވާބުދެއްވާފައެވެ. އަދި އެކޮމިޓީން މިއަދު ވަނީ، ޕީޖީ ޝަމީމް ހުސައިން ޝަމީމް މަޤާމުން ވަކިކުރަން ފާސްކޮށްފައެވެ.