ބިދޭސީންލައްވާ ގަވާއިދާ ޚިލާފަށް މަސައްކަތްކުރުވާ ދިވެހިންނާމެދު އިމިގްރޭޝަންގެ ގާނޫނުގެ ދަށުން އެޅެން އޮންނަ ފިޔަވަޅު މިއަދުންފެށިގެން އަޅަމުންގެންދާނެ ކަމުގައި، ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.

މިނިސްޓަރ އިޙްސާން މިހެން ވިދާޅުވީ، ހޯމްލޭންޑް ސެކިއުރިޓީ މިނިސްޓްރީ އާއި ހެލްތު މިނިސްޓްރީ އަދި އިކޮނޮމިކް މިނިސްޓްރީ ގުޅިގެން މިއަދު ހަވީރު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.

މިނިސްޓަރ އިހްސާން ވިދާޅުވީ، ބިދޭސީން ލައްވައި ޤަވާއިދާއި ޚިލާފަށް މަސައްކަތްކުރުވާ ދިވެހިން 50000ރ އާއި ހަމައަށް ޖޫރިމަނާ ކުރުމާއި ޕާސްޕޯޓު ހިފެހެއްޓުމުގެ ބާރު، އިމިގްރޭޝަންގެ ޤާނޫނުގެ ދަށުން ލިބޭ ކަމަށާއި އެ ފިޔަވަޅު މިއަދުންފެށިގެން އަޅުއްވަމުން ގެންދަވާނެ ކަމަށެވެ.

މިނިސްޓަރ އިހްސާން ވިދާޅުވީ، ބިދޭސީން ލައްވައި ޤާނޫނާއި ޚިލާފު ޢަމަލުތައް ކުރުވާކަން ފާހަގަކުރެވިފައިވާ ކަމަށާއި އެކަންކަމަށްވެސް ފިޔަވަޅު ނާޅައި ދޫނުކުރައްވާނެ ކަމަށެވެ. 

މިނިސްޓަރ އިހްސާން ވަނީ، ވަޒީފާ އާއި ބެހޭ ޤާނޫނަށް ގެންނަން ސަރުކާރުން މިހާރު ހުށައަޅާފައިވާ އިސްލާޙްތަކުގެ ތެރޭގައިވެސް ބިދޭސީންނާއި މެދު އިހުމާލުވާ ވަޒީފާ ދޭ ފަރާތްތައް، އިހުމާލުވާ ކޮންމެ މީހަކަށް 50000ރގެ ރޭޓުން ޖޫރިމަނާކުރުމަށް ކަނޑައަޅާފައިވާ ކަމަށެވެ. އެހެން ނަމަވެސް އެއިސްލާޙްތައް މަޖިލީހުން އަދި ފާހެއް ނުވެއެވެ.

މިނިސްޓަރ އިހްސާން ވިދާޅުވީ، މިހާރު ސިސްޓަމްގެ ތެރެއިން އެމީހުންނަކީ ކޮބައިކަން އައިޑެންޓިފައިކޮށް، އެކުންފުނިތަކަށް ޚިދުމަތްވެސް ނުދީ ހިފެހެއްޓުމަށް ނިންމާފައިވާ ކަމަށެވެ. މިގޮތުން މި މަހުގެ ބިދޭސީންނާއި ގުޅޭ ފީތައް ދައުލަތަށް ނުދައްކާ ކުންފުނިތަކަށް މިމަހުގެ 30 ވަނަ ދުވަހުންފެށިގެން އެކްސްޕެޓް ޕޯޓަލްގެ ޚިދުމަތް މެދުކަނޑާލާނެ ކަމުގައި މިނިސްޓަރ އިހްސާން ވިދާޅުވިއެވެ.