ޕްރޮސެކިއުޓަރ ޖެނެރަލް ޙުސައިން ޝަމީމް މަޤާމުން ވަކިކުރުމުގެ މައްސަލަ ކުރިޔަށް ގެންދިޔުމަށްޓަކައި، ރައްޔިތުންގެ މަޖިލީހުގެ ޚާއްޞަ ޖަލްސާއެއް މިރޭ ބޭއްވުމަށް ނިންމައިފިއެވެ.

މިރޭ ބޭއްވުމަށް ހަމަޖައްސާފައިވާ ޖަލްސާ ފެށުމަށް ހަމަޖައްސާފައި ވަނީ މިރޭގެ 21:00 ގައެވެ. މިޖަލްސާއަށް އެޖެންޑާކޮށްފައިވާ ހަމައެކަނި ކަމަކީވެސް، ޕްރޮސިކިއުޓަރ ޖެނެރަލް އަލްއުސްތާޛު ޙުސައިން ޝަމީމް މަޤާމުން ވަކިކުރުމުގެ މައްސަލައެވެ.  

މިއަދު މަޖިލީހުގެ ޖުޑިޝަރީ ކޮމިޓީން ޕީޖީ ޝަމީމް މަޤާމުން ވަކިކުރުމަށް ފާސްކޮށްފައިވެއެވެ. މިރޭގެ ޖަލްސާގައި އޮތީ އެކޮމިޓީ ރިޕޯޓު ފާސްކުރުމަށް ވޯޓަށް އެހުމެވެ. ސަރުކާރު ހިންގާޕާޓީ ޕީއެންސީއަށް މަޖިލީހުގެ ސުޕަ މެޖޯރިޓީ އޮތް އިރު، މިރޭ ޕީޖީ ޝަމީމް މަޤާމުން ވަކިކުރާނެއެވެ.

ޝަމީމް މަޤާމުން ވަކިކުރަން ހުށައެޅުއްވީ، ހުޅުދޫ ދާއިރާގެ ޕީއެންސީގެ މެމްބަރު މުހައްމަދު ޝާހިދުއެވެ.

ޝާހިދު ހުށަހެޅުއްވި މައްސަލާގައި ބުނެފައިވާގޮތުން، ޕީޖީ ޝަމީމް މަސައްކަތް ކުރެއްވުމުގައި ތަފާތު ކުރުން ގެންގުލުއްވާކަމަށް ފާހަގަ ކުރައްވާފައިވެއެވެ. އަދި މީގެ އިތުރުން، އެ މަނިކުފާނު މަސައްކަތް ކުރައްވަމުން ގެންދަވަނީ ވަކި މީހެއްގެ ނުފޫޒުން ކަމަށް ވެސް ފާހަގަކޮށްފައި ވެއެވެ. އެގޮތުން، ޕީޖީގެ ބާރުތައް ބޭނުން ކުރަން ވާނީ ވެސް ވަކި ފަރާތަކަށް މަންފާއެއް ހޯދައި ނުދީ، ޒާތީ ތައައްސަބުން އެއްކިބާވެ ހުރެ ބަންޑާރަ ނައިބު ކަނޑައަޅާފައިވާ މައިގަނޑު ސިޔާސަތުތަކާ އެއްގޮތަށް ކަމަށް ޝާހިދު ވިދާޅުވެފައިވެއެވެ.

އެހެންކަމުން، ޝަމީމްއަކީ ޤާނޫނުގެ ދަށުން ޕީޖީގެ މަގާމުން ވަކި ކުރަން ޖެހޭ ފަރާތެއްކަމަށް ޝާހިދު ވަނީ ވިދާޅުވެފައެވެ.

ޕީޖީއަށް ތުހުމަތު ކޮށްފައިވާ މައްސަލަތައް:

·      ކުރީގެ ޓޫރިޒަމް މިނިސްޓަރު އަލީ ވަހީދަށް ކޮށްފައިވާ ޖިންސީ ކުށުގެ ދައުވާތައް ފައިލް ކުރުން.

·      މަގާމުގައި ދެމި ހުރުމަށް ކުރީގެ ޔޫތު މިނިސްޓަރު އަހުމަދު މަހުލޫފްގެ މައްސަލަ ފައިލް ކުރުން.

·      ސަފާރީ ރޭޕް ކޭސްގެ މައްސަލާގައި އެމްޑީޕީ އާ ގުޅުން އޮންނަ ފަރާތެއް ހިމެނޭތީ އިސްތިއުނާފް ނުކުރުން.

·      ނިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް ކުރި ހިއުމަން ޓްރެފިކިންގެ ދައުވާ އަނބުރާ ގެންދިޔުން.

·      ބަނގުރަލާ އާ ގުޅޭ 77 މައްސަލައެއް އަނބުރާ ގެންދިޔުން.

·      އެއް ޖިންސުން ގުޅުން ހިންގުމާ ގުޅޭ 13 މައްސަލައެއް އަނބުރާ ގެންދިޔުން.

·      ވެންޓިލޭޓަރު މައްސަލާގައި ދައުވާ ނުކުރަން ނިންމުން.

·      ޕީޖީ އޮފީހުގެ މުއައްޒަފުންނާ މެދުގައި ތަފާތު ކުރުންތައް ގެންގުޅުން.