ކ. ތިލަފުށީގައި މިއަދު ހިނގި އަލިފާނުގެ ހާދިސާގައި މުދަލާއި އިމާރާތްތަކަށް ގެއްލުންތައް ލިބުނު އިރު އަލިފާން ނިވާލެވުނީ، ދެ ގަޑިއިރު ފަހުން ކަމުގައި އެމްއެންޑީއެފުން ހާމަކުރައްވައިފިއެވެ.

އެމްއެންޑީއެފުން ހާމަކުރައްވާފައިވާ މައުލޫމާތުން އެނގޭ ގޮތުގައި ގުދަނުގައި ރޯވި އަލިފާން ނިވާލެވުނީ، އަލިފާނުގެ ހާދިސާ އެމްއެންޑީފްގެ ފަޔަރ އެންޑް ރެސްކިއު ސަރވިސަސްއަށް ރިޕޯޓްކުރިތާ 2 ގަޑިއިރާއި 28 މިނިޓް ފަހުންނެވެ. އަލިފާން ނިވާލެވުނު އިރު، ފަސް ތަނެއް މުޅިން އަނދައިގެން ގޮސް މާލީ ގޮތުން ވިޔަފާރިތަކަށް އެތައް މިލިޔަން ރުފިޔާއެއްގެ ގެއްލުން ވަނީ ލިބިފައެވެ.

އެމްއެންޑީއެފުން ވިދާޅުވީ، މި ހާދިސާގެ މަޢުލޫމާތު މިއަދު ހެނދުނު 08:36 ހާއިރު އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބުމާއެކު، އެމްއެންޑީއެފް މާލޭ އޭރިއާ ކޮމާންޑް، ތިލަފުށީ ފަޔަރ ސްޓޭޝަނުގެ ފަޔަރ ފައިޓަރުން ވަނީ އެ ސަރަހައްދަށް ގޮސް ހަރަކާތްތެރިވެފައި ކަމަށެވެ. އަދި، ތިލަފުށީ ފަޔަރ ސްޓޭޝަނުގެ ފަޔަރ ފައިޓަރުންނަށް އެހީތެރިކަން ފޯރުކޮށްދިނުމަށް އެމްއެންޑީއެފް ފަޔަރ އެންޑް ރެސްކިޔު ސަރވިސް، މާލޭ ފަޔަރ ސްޓޭޝަނުގެ ފަޔަރ ފައިޓަރުން ވެސް ތިލަފުއްޓަށް ދިޔަ ކަމުގައި އެމްއެންޑީއެފުން ވިދާޅުވެފައިވެއެވެ.

ތިލަފުއްޓަކީ ސިނާޢީ މަސައްކަތްތައް ކުރާ ރަށަކަށް ވުމާއިއެކު، މީގެ ކުރިން ހިނގި އެފަދަ ހާދިސާތަކާއި ގުޅިގެންވެސް އެރަށުގައި އަލިފާން ނިވުމަށް ބޭނުންކުރެވޭނެ އެކަށީގެންވާ ވަސީލަތްތަކާއި ނިޒާމެއް ޤާއިމްކުރެވިފައި ނެތުން އެއީ ވިޔަފާރިވެރިން ކަންބޮޑުވުން ފާޅުކުރަމުން އަންނަ މައްސަލައެކެވެ.

އަލިފާނުގެ ހާދިސާގައި އެންމެ ފުރަތަމަ ރޯވެފައި ވަނީ، ކ.ތިލަފުށީގައި ހުންނަ މެރީންޑޯ ވޯކްޝޮޕުގައެވެ. އެތަނުގައި ރޯވި އަލިފާންގަނޑު އެހެން ސަރަހައްދުތަކަށް ފެތުރިގެން ގޮސް 5 ތަނެއް މުޅިން އަނދައިގެން ދިޔައެވެ. މިހާދިސާގައި، އެކަކަށް އަނިޔާވެގެން އައިޖީއެމްއެޗުގައި ފަރުވާ ދިނުމަށްފަހު، މިހާރު ވަނީ ދޫކޮށްލާފައި ކަމުގައިވެސް އެމްއެންޑީއެފުން ވަނީ ހާމަކުރައްވާފައެވެ.