ރެއާއި މިއަދު ގްރޭޓާ މާލެ ސަރަހައްދުގައި ހޮޑުލުމާއި ބޭރަށް ހިންގުން އިތުރުވި ސަބަބު ދެނެގަތުމުގެ މަސައްކަތް ކުރަމުންދާކަމުގައި ހެލްތު މިނިސްޓްރީން ބުނެފިއެވެ.

އެމިނިސްޓްރީން މިހެން ބުނެފައި ވަނީ ރެއާ މިއަދު ހޮޑުލުމާއި ބޭރަށް ހިންގާތީ، މާލެގެ މައި ދެހޮސްޕިޓަލަށް ދެއްކުމަށް އަންނަ ބަލި މީހުންގެ ޢަދަދު އިތުރުވެފައިވާކަން އެދެ ހޮސްޕިޓަލުންވެސް ހާމަކޮށް އެކަމާއި ގުޅިގެން ސޯޝަލްމީޑިއާގައި ތަފާތު ވާހަކަތައް ފެތުރިފައިވާ ދަނޑިވަޅެއްގައެވެ.

ހެލްތު މިނިސްޓްރީން ބުނީ ޜޯގާ އިތުރުވުމާއި ގުޅިގެން އެޗްޕީއޭ އާއި ކަމާއި ބެހޭ ފަރާތްތަކުން އަޅަންޖެހޭ ފިޔަވަޅުތައް އަޅަމުންދާ ކަމަށެވެ.

މާލެ ސަރަހައްދުގައި ހޮޑުލުމާއި ބޭރަށް ހިންގުމުގެ ރޯގާ ފެތުރެމުންދާތީ، އެކަމަށް ސަމާލުކަން ދިނުމަށް ޖުލައި 20 ވަނަ ދުވަހުވެސް އެޗްޕީއޭއިން ވަނީ އިލްތިމާސްކޮށްފައެވެ. މީގެ އިތުރުން ރެއިންފެށިގެން ކުއްލިއަކަށް ބަލިޖެހިގެން ހޮސްޕިޓަލުތަކަށް ފަރުވާ ހޯދުމަށްދާ މީހުންގެ އަދަދު އިތުރުމާއި ގުޅިގެން އެކަމުގެ ސަބަބު ދެނެގަތުމަށް މަސައްކަތް ކުރަމުންދާކަމުގައިވެސް އެޗްޕީއޭއިން ވަނީ ބުނެފައެވެ.

ރެއާ މިއަދު މާލޭގައި ހޮޑުލުމާއި ބޭރަށް ހިންގުން އިތުރުވީ، ރޭ މާލޭގައި ބޭއްވި މިނިވަންދުވަހުގެ ފުޅަނދު ބުރުގެ ތެރޭގައި ބެހި މެޓާކޭ ކުޑަކުދިން ކާނާ ވިހަވެގެން ކަމަށް ބުނެ ސަރުކާރާއި ދެކޮޅު ފިކުރުގެ ނޫސްތަކާއި ސޯޝަލްމީޑިއާ އެކްޓިވިސްޓުން ވަނީ ޚަބަރު ފަތުރާފައެވެ. އެހެން ނަމަވެސް ހޮޑުލުމާއި ބޭރަށް ހިންގުން މިއަދު އިތުރުވީ ވަކި ސަބަބެއް އަދި ދެނެގަނެވިފައި ނުވާކަމުގައި ކަމާއި ބެހޭ ފަރާތްތަކުން ވަނީ ބުނެފައެވެ.

އެޗްޕީއޭއިން ބުނީ ކޮންމެ އަހަރެއްގައިވެސް ޗުއްޓީ ދުވަސްވަރު ހޮޑުލުމާއި ބޭރަށް ހިންގުމުގެ ރޯގާ އިތުރުވާކަމަށެވެ. އެހެންކަމުން ބަލިޖެހިފައި ވަނިކޮށް އާއްމު ތަންތަނަށް ނުނުކުތުމަށާއި، ބަލި ޖެހިފައިވާ މީހަކު، ބަލިން ފަސޭހަވެ، ބަލީގެ އަލާމަތްތައް ނުފެންނަތާ 24 އިރު ހަމަނުވަނީސް ކާބޯތަކެތި ތައްޔާރުކުރުމުގެ މަސައްކަތްވެސް ކުރުން ރަނގަޅު ނޫންކަމަށެވެ. މީގެ އިތުރުން އާއްމު ސާފުތާހިރުކަމަށް ޚާއްސަކޮށް ސަމާލުކަން ދިނުމަށްވެސް އެޗްޕީއޭއިން ވަނީ އިލްތިމާސްކޮށްފައެވެ.