ދައުލަތުގެ މީޑިއާ ޕީއެސްއެމްއިން އިސްނަގައިގެން، މިއަހަރުގެ ޖޫން މަހު ކުރިޔަށް ގެންދިޔަ ޓެލެތޯން އިން ލިބުނު ފައިސާ ހަވާލުކޮށްފި ކަމުގައި ފޮރިން މިނިސްޓްރީން ވިދާޅުވެއްޖެއެވެ.

އެމިނިސްޓްރީން މީޑިއާތަކަށް ދިން މައުލޫމާތުގައި ބުނެފައި ވަނީ، އެ ޓެލެތޯނުގައި އެކި ފަރާތްތަކުން ހަދިޔާކުރި 19،309،468.02ރ. ފިނޭންސް މިނިސްޓްރީ އާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) މެދުވެރިކޮށް، ސީދާ ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުއާ) އާއި ހަވާލުކޮށްފައިވާ ކަމަށެވެ. އަދި އެ އެފައިސާ އެމްއެމްއޭއިން ފޮނުވައިީފައި ވަނީ، ޔޫ.އެން.އާރް.ޑަބްލިޔު.އޭ ގެ އެކައުންޓަށް ކަމުގައިވެސް ފޮރިން މިނިސްޓްރީން ވިދާޅުވެފައި ވެއެވެ.

ޖޫން 12 ވަނަ ދުވަހު ކުރިޔަށް ގެންދިޔަ ޓެލެތޯނުން ލިބުނު ފައިސާ، ޕީއެސްއެމްއިން ފޮރިން މިނިސްޓްރީ އާ ހަވާލުކޮށްފައި ވަނީ، ޖުލައި މަހުގެ 3 ވަނަ ދުވަހުގައެވެ. އެފައިސާ ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުއާ) ހަވާލުކުރީ ކޮންތާރީޚެއްގައި ކަމެއް ފޮރިން މިނިސްޓްރީން ހާމަކޮށްފައެއް ނުވެއެވެ.

މީގެ ކުރިން ރާއްޖޭގައި ސަރުކާރުން ހިންގި ފަންޑް ރައިޒިން ހަރަކާތްތަކުން ލިބުނު ފައިސާއަށް ސަރުކާރުގެ އިސްބައެއް ބޭފުޅުން ޚިޔާނާތްތެރިވި ކަމުގެ ތުހުމަތުތައްވެސް ކުރެވުނެވެ. މިގޮތުން 1987 ވަނަ އަހަރު، ފަލަސްޠީނުގެ ރައްޔިތުންގެ ފުރަތަމަ އިންތިފާޟާ ފެށިގެން ދިޔަ ދުވަސްވަރު ފަލަސްޠީނުގެ ރައްޔިތުންނަށް އެހީތެރިވުމަށް ދިވެހިން ހަދިޔާކުރި ފައިސާ އަށާއި، 2017 ވަނަ އަހަރު ރޮހިންޔާ މުސްލިމުންނަށް އެހީވުމަށް ހިންގި ހަރަކާތްތަކުން ލިބުނު ފައިސާއަށް އޭރުގެ ސަރުކާރުގެ ފަރާތްތަކުން ޚިޔާނާތްތެރިވި ކަމުގެ ތުހުމަތުތައް ކުރެވުނެވެ.