ދިވެހިރާއްޖޭގެ 59ވަނަ މިނިވަން ދުވަހާއިގުޅުވައިގެން، މިނިސްޓްރީ އޮފް ހޯމް އެފެއާޒާއި އާބަންކޯ ގުޅިގެން މިރޭ ހުޅުމާލެ ސެންޓަރަލް ޕާކުގައި ފެށުމަށް ހަމަޖައްސާފައިވާ "މިނިވަން އުފާ" ކާނިވާ މުައްދަތެއް ނެތި ފަސްކޮށްފިއެވެ.

މިނިސްޓްރީ އޮފް ހޯމްއެފެއާޒުން ބުނީ ކާނިވާ ފަސްކޮށްފައި ވަނީ، މިހާރު މާލެ ސަރަހައްދުގައި ފެތުރެމުންދާ ހޮޑުލުމާއި ބޭރަށް ހިންގުމުގެ ރޯގާއާއި ގުޅިގެން އެޗްޕީއޭގެ ލަފާގެ މަތިން ކަމަށެވެ.

ރެއިން ފެށިގެން މާލޭގައި ހޮޑުލުމާއި ބޭރަށް ހިންގުމުގެ ރޯގާ ޖެހޭ މީހުންގެ އަދަދު ކުއްލިއަކަށް އިތުރުވެ ސިއްޙީޚިދުމަތްދޭ ތަންތަނަށް ވަނީ ނުކަތާފައެވެ. މިގޮތުން ސަރުކާރުގެ މައި ހަސްފަތާލު އައިޖީއެމްއެޗާއި އޭޑީކޭ ހޮސްޕިޓަލް އަދި ޓްރީޓޮޕް ހޮސްޕިޓަލައި ހުޅުމާލެ ހޮސްޕިޓަލްގެ އީއާރްގެ ޚިދުމަތްކަށް އޮބި ނޯންނަވަރަށް ބަލިމީހުން އަންނަމުންދާ ކަމުގައި ރިޕޯޓްކޮށްފައިވެއެވެ.

މިނިސްޓްރީ އޮފް ހޯމް އެފެއާޒުން ބުނީ، ކާނިވާ ހުޅުވާނެ ތާރީޚެއް ފަހުން އިޢުލާނު ކުރާނެ ކަމަށެވެ.

Imran Abdulla on Twitter: "ބޭރަށް ހިންގުމާ ހޮޑުލުން އިތުރުވަމުންދާތީ @HPA_MV ގެ ލަފާގެމަތިން، މިނިވަން ދުވަހުގެ މުނާސަބަތުގައި މިރޭ ބޭއްވުމަށް ރާވާފައޮތް ކާނިވަލް ހުޅުވުން ފަހުގެ ތާރީޚަކަށް ފަސްކޮށްފިން. މިހާލަތުގައި ހުރިހާ ބޭފުޅުންވެސް އެޗްޕީއޭ އާއި ސިއްހީ މާހިރުންގެ އިރުޝާދަށް ތަބާވުން އެދެން." / X

މިނިވަން ދުވަހުގެ ކާނިވާ ފަސްކުރިކަން އިއުލާނު ކުރައްވައި މިނިސްޓަރ އޮފް ހޯމްއެފެއާޒް އައްޝައިޚް ޢިމްރާން ޢަބުދުﷲ ކުރެއްވި ޓްވީޓެއްގައި ވަނީ، ހުރިހާ ފަރާތްތަކުންވެސް އެޗްޕީއޭއާ ޞިއްޙީ މާހިރުންގެ އިރުޝާދުތަކަށް ބޯލެނބުމަށް އެދިވަޑައިގެންފައެވެ.

މިނިވަން އުފާ ކާނިވަލް ފެށުން ފަހުވަގުތު ކެންސަލް ކުރަން ޖެހުނު އިރު އެކާނިވާ މިރޭ ފެށުމަށް ވާންޖެހޭ ތައްޔާރީތަައް އޮތީ މުޅިހެން ނިމިފައެވެ.

މިނިވަން އުފާ ކާނިވަލް ހުޅުވުން ފަސްކުރުމާއި އެކު މިރޭ ބޭއްވުމަށް ހަމަޖައްސާފައި އޮތް ހަވާ އެރުވުމާއި ޑްރޯން ޝޯވ އާއި ޕެރަމޮޓޯ ހަރަކާތްވެސް ވަނީ ކެންސަލްކޮށްފައެވެ.