ދިވެހިރާއްޖޭގައި ވަޒީފާ އަދާކުރާ ބިދޭސީންނާއި ގުޅިގެން ދައްކަންޖެހޭ ފައިސާ 31 އޮގަސްޓް 2024ގެ ކުރިން ދައްކާ ޚަލާސްނުކުރާ ފަރާތްތައް, 1 ސެޕްޓެމްބަރ 2024ން ފެށިގެން އެކްސްޕެޓް ސިސްޓަމް އިން ސަސްޕެންޑްކޮށް ޚިދުމަތް މެދުކަނޑާލާނެ ކަމުގައި، މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ އިން ވިދާޅުވެއްޖެއެވެ.

އެމިނިސްޓްރީންކޮށްފައިވާ އިއުލާނުގައި ބުނެފައި ވަނީ، ދިވެހިރާއްޖޭގައި ވަޒީފާ އަދާކުރާ ބިދޭސީންނާއި ގުޅިގެން ދޫކުރާ ހުއްދަތަކަށް ދައުލަތަށް ދައްކަންޖެހޭ ފީތަކާއި ޖޫރިމަނާ -/100,000 ރ (އެއްލައްކަ ރުފިޔާ) އަށްވުރެ އިތުރުވާ ވަޒީފާދޭ ފަރާތްތައް ފައިސާ ދައްކާ ޚަލާސްކުރުމަށް ދީފައިވާ މުއްދަތު، 2024 އޮގަސްޓު 31 ވަނަ ދުވަހާއި ހަމައަށް އިތުރުކޮށްދީފައިވާ ކަމަށެވެ. އަދި މިތާރީޚާ ހަމައަށް ފައިސާ ދައްކާފައިވާނުވާ ވަޒީފާދޭ ފަރާތްތައް، 2024 ސެޕްޓެންބަރު 01 ވަނަ ދުވަހުން ފެށިގެން، އެކްސްޕެޓް ސިސްޓަމް އިން ސަސްޕެންޑް ކުރެވި ސިސްޓަމް މެދުވެރިކޮށް ދެމުން ގެންދާ ޚިދުމަތްތައް މެދުކަނޑާލެވޭނެ ކަމުގައިވެސް އެމިނިސްޓްރީން ވަނީ ވިދާޅުވެފައެވެ.

މީގެ އިތުރުން އެމިނިސްޓްރީން ވަނީ، ދިވެހިރާއްޖޭގައި ވަޒީފާ އަދާކުރާ ބިދޭސީންނާ ގުޅޭ ހުއްދަތައް ދޫކުރުމަށް ބޭނުންކުރާ "އެކްސްޕެޓް ސިސްޓަމް" ބޭނުންކުރާ ބިދޭސީންނަށް ވަޒީފާދޭ ފަރާތްތަކާއި އަދި "އެކްސްޕެޓް ސިސްޓަމް" ބޭނުންކުރާ އެހެނިހެން ފަރާތްތަކަށް ޚާއްޞަކޮށް، މިއަންނަ އަންގާރަ ދުވަހު ބައްދަލުވުމެއް ބޭއްވުމަށް ނިންމައި، އެބައްދަލުވުމުގައި ބައިވެރިވުމަށް ފުރުޞަތުވެސް ހުޅުވާލާފައެވެ. މިގޮތުން، މި ބައްދަލުވުމުގައި ބައިވެރިވާން ބޭނުންވާ ވަޒީފާދޭ ފަރާތްތަކާއި، ސިސްޓަމް ބޭނުންކުރާ އެހެނިހެން ފަރާތްތަކުން އެކަމަށް ތައްޔާރުކޮށްފައިވާ އޮންލައިން ފޯމު 2024 އޮގަސްޓު 19 ވާ ހޯމަ ދުވަހުގެ މެންދުރު 12:00 ގެ ކުރިން ފުރިހަމަ ކުރުމަށްފަހު ހުށަހެޅުމަށްވެސް އެމިނިސްޓްރީން ވަނީ އެދިވަޑައިގެންފައެވެ.

އޮންލައިން ފޯމުގެ ލިންކް:

https://forms.office.com/r/D35whaNupv