"2024 އިންޓަރރީޖަނަލް ސެމިނަރ އޮން ދަ އެޗީވްމެންޓް އޮފް ދަ އެސްޑީޖީސް ފޯރ ޕާލަމެންޓްސް އޮފް ޑެވެލޮޕިންގ ކަންޓްރީސް"ގައި ބައިވެރިވެވަޑައިގަތުމަށް، ރައްޔިތުންގެ މަޖިލީހުގެ ރައީސް، ޢަބްދުއްރަޙީމް ޢަބްދުﷲ ޗައިނާއަށް ފުރާވަޑައިގެންފިއެވެ،

މިސެމިނާގައި ބައިވެރިވެވަޑައިގެންނެވުމަށް ކުރައްވާ ދަތުރުުފުޅުގައި، ރައްޔިތުންގެ މަޖިލީހުގެ ރައީސް، ޢަބްދުއްރަޙީމް ޢަބްދުﷲ ޗައިނާއަށް ފުރާވަޑައިގެންނެވީ ރޭގައެވެ. މިއީ ރައްޔިތުންގެ މަޖިލީހުގެ ރައީސް ކަމުގެ މަޤާމަށް ވަޑައިގެންނެވުމަށްފަހު، ޢަބްދުއްރަޙީމް ރަސްމީ ހައިސިއްޔަތުން މިފަދަ ސެމިނަރއެއްގައި ބައިވެރިވެވަޑައިގެންނެވުމަށް އެމަނިކުފާނު ރާއްޖެއިން ބޭރަށް ކުރައްވާ ފުރަތަމަ ދަތުރުފުޅެވެ.

"2024 އިންޓަރރީޖަނަލް ސެމިނަރ އޮން ދަ އެޗީވްމެންޓް އޮފް ދަ އެސްޑީޖީސް ފޯރ ޕާލަމެންޓްސް އޮފް ޑެވެލޮޕިންގ ކަންޓްރީސް"އަކީ، އިންޓަ ޕާލިމަންޓަރީ ޔޫނިއަން (އައިޕީޔޫ) އިން އިންތިޒާމުކޮށްގެން ބާއްވަމުން އަންނަ ސެމިނަރ އެކެވެ. މިފަހަރު މިސެމިނަރ ބާއްވަނީ، ޗައިނާގެ ބެއިޖިންގައި މިމަހުގެ 19 އިން 29 އަށެވެ. މިއަހަރުގެ ސެމިނަރގައި ސަރަހައްދީ ޤައުމުތަކުގެ ތެރޭގައި ހިމެނޭ، ތަރައްޤީވަމުން އަންނަ 32 ޤައުމަކުން ބައިވެރިއެވެ.