ރާއްޖެއަށް އިސްލާޙީ ބަދަލުތައް ގެނައުމަށް އެމްޑީޕީއާއެކު އެންމެ ކުރީ ސަފުގައި މަސައްކަތް ކުރެއްވި، ރާއްޖޭގެ ކުރީގެ މަޝްހޫރު ވިޔަފާރުވެރިޔާ މުޙައްމަދު ޒާހިރު (އޯކޭ ޒާހިރު) ނިޔާވުމާއި ގުޅިގެން އޭނާގެ އާއިލާއަށް، ރައީސުލްޖުމްހޫރިއްޔާ އާއި އެމަނިކުފާނުގެ ނައިބު ތަޢުޒިޔާގެ މެސެޖެއް ފޮނުއްވައިފިއެވެ.

ސްރީ ލަންކާގައި ދިރިއުޅުއްވަމުންގެންދެވި ޒާހިރު ނިޔާވީ، ރޭ ފަތިހު 4:30 ހާއިރު ކޮލަމްބޯގައި ހުންނަ އާސިރީ ހޮސްޕިޓަލްގައެވެ. އަވަހާރަވިއިރު އުމުރުފުޅަކީ، 76 އަހަރެވެ.

ޒާހިރު އަވަހާރަވުމާއި ގުޅިގެން ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ކުރެއްވި ޕޯސްޓުގައި ވަނީ، އޯކޭ ޒާހިރަކީ، ރާއްޖޭގައި ކާރުޚާނާ ހިންގަވައި، ޤައުމުގެ އަމިއްލަ އުފެއްދުންތައް ބާޒާރަށް ނެރުއްވުމަށް ގިނަ މަސައްކަތްތަކެއް ކުރެއްވި ބޭފުޅެއްކަން ފާހަގަކުރައްވާފައެވެ.

ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ކުރެއްވި ޕޯސްޓްގައި، މުހައްމަދު ޒާހިރު (އޯކޭ ޒާހިރު) އަވަހާރަވި ޚަބަރު އެހީ ފުންހިތާމައާއެކުގައި ކަމަށް ވިދާޅުވެފައިވެއެވެ.

ޒާހިރަކީ، އެމްޑީޕީގެ އިސް ސަފުގައި މަސައްކަތް ކުރެއްވުމުގެ އިތުރުން އެމްޑީޕީގެ ފުރަތަމަ ވެރިކަމުގައި، ބައެއް މަޤާމުތައްވެސް ފުރުއްވާފައިވާ ބޭފުޅެކެވެ.