އެންވަޔަރަންމަންޓް ޕްރޮޓެކްޝަން އޭޖެންސީ (އީޕީއޭ) މިނިވަންކަމާއި އެކު ހިންގާ ތަނަކަށް ހެދުމަށްޓަކައި އެތަނަށް އިތުރު ވަޞީލަތްތަކާއި ޓެކްނިކަލް އެހީ ބޭނުންވާ ކަމިގައި މިނިސްޓަރ އޮފް އެންވަޔަރަންމަންޓް ކްލައިމެޓްޗޭންޖް އެންޑް ޓެކްނޯލޮޖީ އާމިނަތު ޝައުނާ ވިދާޅުވެއްޖެއެވެ.

މިނިސްޓަރ ޝައުނާ މިހެން ވިދާޅުވީ މިއަދު އޮތް ރައްޔިތުންގެ މަޖިލީހުގެ ޖަލްސާގައި ވަޒީރުންނާއި ސުވާލު ކުރުމުގެ ވަގުތުގައި، ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު އިބްރާހީމް ވަހީދު ކުރެއްވި ސުވާލަށް ޖަވާބު ދެއްވަމުންނެވެ. މެމްބަރު ވަޙީދު ސުވާލު ކުރައްވާފައި ވަނީ، އެންވަޔަރަމަންޓް ޕްރޮޓެކްޝަން އޭޖެންސީ މިނިވަން މުސްތިޤިއްލު ތަނަކަށް ހެދުމަށް ކުރެވޭ މަސައްކަތްތަކާއި ގުޅޭ ގޮތުންނެވެ.

މިނިސްޓަރ ޝައުނާ ވިދާޅުވީ މިސަރުކާރު އައިރު އީޕީއޭއަށް އެވްރެޖްގޮތެއްގައި ލިބެމުން އައީ 9.7 މިލިއަން ރުފިޔާގެ ބަޖެޓެއް ކަމަށެވެ. އަދި މިސަރުކާރުން ވަނީ އީޕީއޭގެ ބަޖެޓް މިހާރު 15.3 މިލިއަން ރުފިޔާއަށް އިތުރުކޮށްދީފައި ކަމުގައި މިނިސްޓަރ ޝައުނާ ވިދާޅުވިއެވެ.

އަދި އޭގެ އިތުރުން އީޕީއޭގެ ނިންމުންތަކަކީ ސައިންޓިވިކް ނޮލެޖަށް އަދި ސައިންޓިފިކް ބޭސިސްއަށް ބިނާކޮށް ނިންމާ ނިންމުމަކަށް ހެދުމަށް އަންނަނީ މަސައްކަތްތަކެއް ކުރަމުން ކަމުގައިވެސް މިނިސްޓަރ ޝައުނާ ވިދާޅުވިއެވެ.

މިނިސްޓަރ ޝައުނާގެ ވާހަކަފުޅުގައި ވަނީ، ދުނިޔޭގެ އެހެން ޤައުމުތަކުގައި އެންވަޔަރަމަންޓް ޕްރޮޓެކްޝަން އޭޖެންސީތައް އުފައްދާފައިވާ ގޮތާއި އެތަންތާނގެ ދައުރާއި ހައިސިއްޔަތާއި ބާރުވެރިކަމާއި ގުޅޭ ގޮތުން މައުލޫމާތު ހިއްޞާ ކުރައްވާފައެވެ. އަދި ރައީސް ޔާމީންގެ ދައުރުގައި އީޕީއޭގެ މެންޑޭޓް ހަނިކުރައްވައި، އެތަނުގެ ބައެއް މަސައްކަތްތައް ޓޫރިޒަމް މިނިސްޓްރީގެ ދަށަށް ބަދަލު ކުރެވިގެން ދިޔަކަންވެސް މިނިސްޓަރ ފާހަގަ ކުރައްވާފައި ވެއެވެ.