ދުނިޔޭގެ އެންމެ މަގުބޫލު ފުޓުބޯޅައިގެ ބޮޑު ތިން ލީގެއްގެ މެޗުތައް މިރޭ ފަށާނެއެވެ. އެގޮތުން، އިނގްލިޝް ޕްރިމިއަރ ލީގު، ޖަރުމަން ލީގު އަދި ސްޕެނިޝް ލީގުގެ މެޗުތަކެއް ވަނީ މިރޭ ކުޅުމަށް ތާވަލުކޮށްފައެވެ. އަދި އިޓަލީ ލީގުގެ މެޗުތައް ފެށުމަށް ހަމަޖެހިފައިވަނީ މާދަމާރެއެވެ.

އެންމެ ގިނަ ދިވެހިން ބަލާ އިންގްލިޝް ޕްރިމިއަ ލީގުގައި މިރޭ ކުޅޭނީ މެންޗެސްޓަރ ޔުނައިޓެޑާއި ފުލަމްއެވެ. އޯލްޑް ޓްރެފާޑްގައި ކުޅުމަށް ހަމަޖެހިފައިވާ މި މެޗު ފަށާނީ ދަންވަރު 12 ޖަހާއިރުއެވެ.

ސްޕެނިޝް ލީގުގައި މިރޭ ދެ މެޗެއް ކުޅުމަށް ހަމަޖެހިފައިވެއެވެ. އެގޮތުން ރާއްޖެ ގަޑިން މިރޭ 10 ޖަހާއިރު ފަށާމެޗުގައި ބައްދަލު ކުރާނީ ސެލްޓާ ވީގޯ އާއި އަލާވޭޒްއެވެ. ދެވަނަ މެޗުގައި މިރޭ ދަންވަރު 12:30 ގައި ކުޅޭނީ ލަ ޕާމާސް އާއި ސެވިއްޔާއެވެ.

ޖަރުމަނު ލީގުގައި މިރޭ ކުޅޭނީ އެއް މެޗެވެ. އެ މެޗުގައި ލީގުގެ އެންމެ ފަހުގެ ޗެމްޕިއަން، ބެޔާން ލެވަކޫސެން ނިކުންނާނީ މޮންޝެންގްލަބަޗްއާ ދެކޮޅަށެވެ. އެ މެޗު ފެށުމަށް ހަމަޖެހިފައިވަނީ ރާއްޖެ ގަޑިން 11:30 ގައެވެ.

އިޓަލީ ލީގުގެ އެއްވެސް މެޗެއް މިރެއަށް ޝެޑިއުލް ކޮށްފައެއް ނުވެއެވެ. ނަމަވެސް މާދަމާރޭ އެ ލީގުގައި ހަތަރު މެޗު ކުޅޭނެއެވެ. އެގޮތުން 9:30 ގައި ދެ މެޗު ފެށުމަށް ހަމަޖެހިފައިވާ އިރު، އެތަނުން އެއް މެޗުގައި، އެންމެ ފަހުގެ ޗެމްޕިއަން އިންޓަމިލާން ނިކުންނާނީ ޖެނޯއާ ދެކޮޅަށެވެ. އަދި އޭސީ މިލާންގެ މެޗެއް ވެސް މާދަމާ ރޭ ކުޅޭނެއެވެ. ރާއްޖެ ގަޑިން 11:45 ގައި ފެށުމަށް ހަމަޖެހިފައި އެ މެޗުގައި އޭސީ މިލާން ނިކުންނާނީ ޓޮރީނޯ އާ ދެކޮޅަށެވެ.