ސަސްޕެންޑް ކުރިތާ ދޮޅުމަސް ދުވަސްފަހުން، ރައީސުލްޖުމްހޫރިއްޔާގެ އޮފީހުގެ މިނިސްޓަރ އާދަމް ރަމީޒު މަޤާމުން ވަކިކުރައްވައިފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މިނިސްޓަރ އެޓް ދަ ޕްރެޒިޑެންޓްސް އޮފީސް ގެ މަޤާމަށް، އާދަމް ރަމީޒް އައްޔަނުކުރައްވާފައި ވަނީ، ޑރ. މުޙައްމަދު މުޢިއްޒު ވެރިކަމުގެ ހުވާކުރެއްވި ދުވަހުގައި 17 ނޮވެމްބަރު 2023 ގައެވެ. ރައީސް އޮފީހުން ބަލަމުން ގެންދާ މައްސަލައަކާއި ގުޅިގެން މިނިސްޓަރ ރަމީޒު މަޤާމުން ސަސްޕެންޑްކޮށްފައި ވަނީ، މިއަހަރުގެ ޖޫން މަހުގެ 27 ވަނަ ދުވަހުގައެވެ. އޭގެ ކުރިންވެސް ރައީސް ޑރ. މުއިއްޒާއި އާދަމް ރަމީޒުގެ މެދުގައި މައްސަލަޖެހި ވަނީ ގުޅުން ގޯސްވެފައެވެ.

އާދަމް ރަމީޒާއި ގުޅޭ މައްސަލައެއް ބަލަމުންދާކަން އެނގިފައި ވީނަމަވެސް އެމައްސަލަ އާއި ގުޅޭ ގޮތުން ސަރުކާރުން ވާހަކަ ދައްކާފައެއް ނުވެއެވެ. އަދި އާދަމް ރަމީޒު މަޤާމުން ވަކިކުރެއްވި ސަބަބެއްވެސް ސަރުކާރުން ހާމަކުރައްވާފައެއް ނުވެއެވެ.

ރައީސުލްޖުމްހޫރިއްޔާގެ އޮފީހުގެ ވެބްސައިޓްގައި ޝާއިއުކޮށްފައިވާ އެ އޮފީހުގެ މަޤާމުތަކުގައި ތިއްބެވި ބޭފުޅުންގެ ލިސްޓުގެ ތެރެއިން އާދަމް ރަމީޒުގެ ނަމާއި ފޮޓޯ މިހާރު ވަނީ ނަގާފައެވެ.