ޕްރޮސެކިއުޓަރ ޖެނެރަލްގެ މަޤާމުގައި ހުންނެވި ޙުސައިން ޝަމީމް މަޤާމުން ވަކިކުރުމުގެ މައްސަލައިގައި ޖަވާބުދާރީވުމަށް ރައްޔިތުންގެ މަޖިލީހުން އޭނާއަށް ނޯޓިސް ފޮނުއްވައިފިއެވެ.

ޕީޖީ ހުސައިން ޝަމީމަށް މިހާރު ނޯޓިސް ފޮނުއްވާފައިވާކަމުގައި ރައްޔިތުންގެ މަޖިލީހުގެ އިދާރާއިން ވަނީ، ނޫން.އެމްވީއަށް މައުލޫމާތު ދެއްވާފައެވެ. ޕްރޮސެކިއުޓާ ޖެނެރަލް (ޕީޖީ) ހުސައިން ޝަމީމް މަގާމުން ވަކިކުރުމަށް ރައްޔިތުންގެ މަޖިލީހުގެ ޖުޑިޝަރީ ކޮމިޓީއަށް ހުށަހަޅާފައިވާ މައްސަލާގައި ޖަވާބުދާރީވާން  އެމަނިކުފާނު އެކޮމިޓީއަށް ހާޒިރުކުރުމަށް ކޮމެޓީގެ މިއަދުގެ ބައްދަލުވުމުގައި ވަނީ ފާސްކޮށްފައެވެ.

ޕީޖީ ހުސައިން ޝަމީމް މަޤާމުން ވަކިކުރުމުގެ މައްސަލަ ރައްޔިތުންގެ މަޖިލީހަށް ހުށައަޅުއްވާފައި ވަނީ، ހުޅުދޫ ދާއިރާގެ މެމްބަރު މުހައްމަދު ޝާހިދު (ޝާޑު) އެވެ. އޭނާ ވަނީ، ގާނޫނުއަސާސީގެ 228 ވަނަ މާއްދާ އާއި ޕީޖީ ހުސައިން ޝަމީމް ޚިލާފުވެވަޑައިގެންފައިވާ ކަމަށް ތުހުމަތު ކުރައްވާފައެވެ.

ޕްރޮސެކިއުޓަރ ޖެނެރަލް ކަމުގެ މަޤާމަށް ޙުސައިން ޝަމީމް ޢައްޔަނުކުރައްވާފައި ވަނީ، 2019 ވަނަ އަހަރުގެ ޑިސެމްބަރު މަހުގައެވެ.