ރާއްޖެއަށް ގެންނަ ބިދޭސީ މަސައްކަތްތެރިންނާއި މެދު ވަޒީފާ ދޭފަރާތްތަކުން އިހުމާލުވެއްޖެނަމަ، އެފަރާތްތައް 50000ރ އިން ޖޫރިމަނާކުރުމަށް، ވަޒީފާ އާއި ބެހޭ ޤާނޫނަށް އިސްލާޙް ގެނައުމުގެ ބިލަށް ހުށައެޅި ހުށައެޅުން، މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީގެ މުގައްރިރު އޭދަފުށީ ދާއިރާގެ މެމްބަރު އަހުމަދު ސަލީމް (ރެޑްވޭވް) ދެއްވި ވޯޓާއި އެކު ފާސްކޮށްފިއެވެ.

މި އިސްލާހް ފާސްކުރުމަށް ކޮމިޓީ މަރުޙަލާގައި ވޯޓަށް އެހުމުން، ވޯޓު އެއްވަރުވުމުން ގޮތެއް ކަނޑައަޅަށް ވޯޓު ދެއްވަން ޖެހިވަޑައިގަތީ، ކޮމިޓީގެ މުގައްރިރު އޭދަފުށީ ދާއިރާގެ މެމްބަރު އަހުމަދު ސަލީމް (ރެޑްވޭވް) އަށެވެ. ސަލީމަކީ ވެސް ގިނަ އަދަދެއްގެ ބިދޭސީ މުވައްޒަފުން ގެންގުޅުއްވާ ބޭފުޅެއް ނަމަވެސް، އެ މާއްދާ އޭނާގެ ވޯޓުން ފާސްކުރެއްވި އިރު، އެކޮމެޓީގައި ހިމެނިވަޑައިގެން ތިއްބެވި އެހެން ބޮޑެތި ވިޔަފާރިވެރިން ވޯޓު ދެއްވާފައި ވަނީ އެގޮތަށް ފާސްކުރުމަށް ނުފެންނަ ކަމަށެވެ. އޭގެ ތެރޭގައި ޤާސިމް އިބްރާހީމާއި، މެމްބަރު ނާޒިމް ހިމެނިވަޑައިގަންނަވައެވެ.

ވަޒީފާ އާއި ބެހޭ ޤާނޫނަށް ގެންނަ އިސްލާޙުގައިވާ ގޮތުން، ބިދޭސީންނާއި މެދު އިހްމާލުވާ މައްސަލަތަކުގައި އެ ޖޫރިމަނާ ކަނޑައަޅާނީ ކޮންމެ މީހަކަށް ވަކިވަކީންނެވެ. އެހެންވެ އެކަމާއި މެދު ކޮމިޓީގައި ތިއްނެވި ވިޔަފާރިވެރިން ވަނީ ކަންބޮޑުވުން ފާޅުކުރައްވާފައެވެ.

ބިދޭސީ މުވައްޒަފުންނަށް މުސާރަ ނުދިނުމާއި އިހުމާލުވުމުގެ މައްސަލަތައް ގިނައިރު، ޤާނޫނަށް ގެންނަ އިސްލާޙްގައި ވަނީ، މުސާރަ އާއި އިނާޔާތްތައް ނުދިނުމާއި، އަސާސީ ހައްޤުތައް ފޯރުކޮށް ނުދިނުމާއި، ވަޒީފާގެ ޒިންމާ އާއި މަސްއޫލިއްޔަތުގައި ނުހިމެނޭ މަސައްކަތްތައް ކުރުވުމާއި، ޤާނޫނާއި ޚިލާފު މަސައްކަތްތައް ކުރުވުމަކީ، އިޙްމާލުވުންކަން ކަނޑައަޅާފައެވެ. އެހެން މިގެންނަ ބަދަލުގެ ސަބަބުން ބިދޭސީ މުަވައްޒަފުންނަށް މުސާރަ ނުދިނުން ފަދަ މައްސަލަ ތަކުގައި، ވަޒީފާދޭ ފަރާތް 50000ރ އިން ޖޫރިމަނާކުރުމަށް ފުރުޞަތު ލިބިގެންދާނެއެވެ. އެހެން ނަމަވެސް މިބިލް ޤާނޫނަކަށް ވެގެންދާނީ، މަޖިލީހުގެ ތަޅުމުން ފާސްކޮށް، ރައީސުލްޖުމްހޫރިއްޔާ ތަސްދީޤު ކުރައްވައި ގެޒެޓް ކުރެއްވުމުންނެވެ.