ބޯކޮށްވާރޭ ވެހުމާއި ފެންބޮޑުވުމުގެ ސަބަބުން ފެތުރިދާނެ ބަލިމަޑުކަމަކުން ރައްކާތެރިވެ ތިބުމަށް އެޗްޕީއޭއިން އިލްތިމާސްކުރައްވައިފިއެވެ.

އެޗްޕީއޭއިން ވިދާޅުވީ، ވިސާރަައަށް ފަހު ކުރިޔަށް އޮތް ދުވަސްތަކުގައި، ހޮޑުލުމާއި ބޭރަށް ހިންގުމާއި މަދިރީގެ ސަބަބުން ފެތުރޭ، ޒިކާ އާއި ޗިކުންގުންޔާ އާއި ޑެންގީ ފަދަ ބަލިތައް ފެތުރުމުގެ ފުރުސަތު އޮތްކަމަށެވެ.

މީގެ އިތުރުންވެސް ބުޅަލުގެ ނަޖިހާއި މީދަލުގެ ނަޖިހުން ފެތުރޭ ބަލިތަކާއި، ފެންބޮޑުވުމުގެ ސަބަބުން ޖަންކްޝަންތަކުން ނަޖިސް ބޭރުވުމުގެ ސަބަބުން ފެތުރިދާނެ ބަލިތަކަށް ސަމާލުވުމަށް އެޗްޕީއޭއިން ވަނީ އިލްތިމާސްކޮށްފައެވެ.

އަދި ވާރޭވެހި އުފެދޭ ފެންގަނޑުތަކުގެ ތެރެއަށް އެރި ނޫޅުމަށާއި، ކުޑަކުދިންވެސް އެފަދަ ފެންގަނޑުތަކުގެ ތެރެއަށް އެރި ކުޅެ ހެދުމަށް ދޫކޮށް ނުލުމަށް އެޗްޕީއޭއިން އިލްތިމާސްކޮށްފައިވެއެވެ. އަދި އެފަދަ ފެންގަނޑުތަކަށް އެރެން ޖެހޭ ހާލަތުގައި ހަށިގަނޑުގައި ފެން ނުޖެހޭނެ ފަދަ ކޯޓާއި، ރަބަރު އަންގިއާއި ބޫޓާއި އެނޫންވެސް އެފަދަ ތަކެތި ބޭނުން ކުރުމަށް އިލްތިމާސްކުރައްވާފައިއެވެ.

މާލޭގެ މަގުތައް މަތީގައި ގިނަ އަދަދެއްގެ ބުޅާ ދިރިއުޅޭ އިރު، ބައެއް ސަރަހައްދުތަކުގައި ބުޅާ ނަޖިސް ވަރަށް ގިނައިން ހުންނަ ކަން ފާހަގަކުރެއެވެ. އިއްޔެ ވެހުނު ވާރޭގައި މާލޭފައި ވަރަށް ބޮޑަށް ފެންބޮޑުވެ 200 ވުރެ ގިނަ ގޭގެގެއަށް ފެނުގެ އަސަރު ކުރި އިރު، ނަރުދަމާ ނިޒާމުން ނަޖިސްފެން ލީކުވުމުގެ މައްސަލަތައްވެސް ވަނީ ފާހަގަ ވެފައެވެ.