ރާއްޖެއިން މުޅިން ނައްތާލެވިފައިވާ ބައްޔެއްކަމުގައިވާ، ހިމަ ބިހި ޖެހިފައިވާ މީހަކު މާލެ ސަރަހައްދުން ފެނުމާއި ގުޅިގެން ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އަޅަން ފަށާފައިވާ ކަމުގައި ހެލްތު ޕްރޮޓެކްޝަން އޭޖެންސީ އެޗްޕީއޭއިން ބުނެފިއެވެ.

އެޗްޕީއޭއިން އާއްމުކޮށްފައިވާ ބަޔާނުގައި ބުނެފައި ވަނީ، ހިމަބިއްސަށް ޕޮޒިޓިވް މީހާއަކީ، ރާއްޖެއިން ބޭރަށް ދަތުރުކޮށްފައިވާ މީހެއް ކަމަށާއި، އޭނާއަށް ބަލިޖެހިފައި ވަނީ ރާއްޖެއިން ބޭރުން ކަމަށެވެ. އަދި އޭނާއަކީ މީސްލްސްގެ ވެކްސިންގެ ދެޑޯޒް ފުރިހަމަކޮށްފައިވާ މީހެއްކަމަށާއި، ހޮސްޕިޓަލްގައި އެޑްމިޓްކޮށް އޭނާއަށް ފަރުވާދެމުން އަންނައިރު އޭނާގެ ހާލަތު ރަނގަޅުވަމުން އަންނަކަމުގައިވެސް އެޗްޕީއޭއިން ވަނީ ބުނެފައެވެ.

މީސްލްސް ވެކްސިންގެ ދެ ޑޯޒް ފުރިހަމަކޮށްފައިވާ މީހުންވެސް ބަލިޖެހިފައިވާ އެހެން މީހަކާއި އެއްތަންވެއްޖެނަމަ ބަލިޖެހުމުގެ %3 ޗާންސް އޮވެއެވެ. އެހެން ނަމަވެސް ވެކްސިން ފުރިހަމަކޮށްފައިވާ ނަމަ ބަލީގައި ބޮޑުވަރުވުމުން ދުރުކޮށްދެއެވެ.

އެޗްޕީއޭއިން ބުނީ، މާލެއިން ހިމަ ބިއްސަށް ޕޮޒިޓިވްވި މީހާވަނީ އޭނާގެ ކިބައިން އެހެން މީހުންނަށް ބަލި ފަތުރާ މުއްދަތުގެ ތެރޭގައި ދަތުރުކޮށް ހޮސްޕިޓަލަށްވެސް ޒިޔާރަތްކޮށްފައެވެ. އެހެންވެ އޭޭނާއާ ބައްދަލުވި މީހުން ދެނެގަތުމަށް ކޮންޓެކްޓް ޓްރޭސިންގ ހަދައި، ވެކްސިން ދޭންޖެހޭ މީހުންނަށް ވެކްސިން ދިނުންވެސް ކުރިޔަށް ގެންދާނެ ކަމަށެވެ.

ހިމަ ބިހިޖެހުމުން ފެންނަ އާއްމު ޢަލާމާތްތަކުގެ ތެރޭގައި ގަދަޔަށް ހުންއައުމާއި، ހަމުގައި ރަތްކުލައިގެ ކުދި ބިހިތަކެއް ނެގުން ހިމެނެއެވެ. މީގެ އިތުރުން ކެއްސުމާއި ނޭފަތުން އަރިދަފުސްފޭބުމާއި، ލޯ ރަތްވުންފަދަ އަލާމާތްތައްވެސް މިބަލީގައި ފެނެއެވެ. ހިިމަބިހީގެ އެއްވެސް ޢަލާމާތެއް ފެނިއްޖެނަމަ ލަސްނުކުރައްވައި އެކަން ކަމާއި ބެހޭ ފަރާތްތަކަށް ރިޕޯޓްކުރެއްވުމަށާއި، ސިއްޙީ ޚިދުމަތްތެރިއެއްގެ އެހީ ހޯއްދެވުމަށް އެޗްޕީއޭއިން ވަނީ އިލްތިމާސްކޮށްފައެވެ.