މެންޗެސްޓަރ ސިޓީގައި ކުޅުމަށް ލިބޭ ވަގުތު މަދުކަމުން ހިތްހަމަނުޖެހިފައިހުރި ހޫލިއަން އަލްވަރޭޒް، ސްޕެއިންގެ އެތުލެޓިކޯ މެޑްރިޑަށް ބަދަލުވެއްޖެއެވެ.

އާޖެންޓީނާގެ ގައުމީ ޓީމާއެކު ވޯލްޑު ކަޕްގެ އިތުރުން ކޮޕާ އެމެރިކާ ކާމިޔާބު ކޮށްފައިވާ 24 އަހަރުގެ އަލްވަރޭޒް އެތުލެޓިކޯއަށް ބަދަލުވެފައިވަނީ 95 މިލިއަން ޔޫރޯއަށެވެ.

މި އަގުގެ ތެރެއިން އެތުލެޓިކޯއިން ފުރަތަމަ ދޭނީ 75 މިލިއަން ޔޫރޯއެވެ. އަދި އެއަށްފަހު އެ ޓީމެއް ބަދަލުވެ، ވަކި ޝަރުތުތަކެއް ފުރިހަމަވާނަމަ ބޯނަސްގެ ގޮތުގައި އިތުރު 20 މިލިއަން ޔޫރޯ ދިނުމަށް އެތުލެޓިކޯ އިން ވަނީ އެއްބަސްވެފައެވެ.

މިއީ މެންޗެސްޓަރ ސިޓީއިން ކުޅުންތެރިއަކު ވިއްކާލި އެންމެ ބޮޑު އަގެވެ. އަދި މި ޓްރާންފާއާއެކު އެ ކުލަބުން މިވަނީ ބޮޑު ފައިދާއެއް ވެސް ހޯދާފައެވެ. އަލްވަރޭޒް ރިވާރ ޕްލޭޓް ދޫކޮށް 2022 ވަނަ އަހަރު ސިޓީއަށް ބަދަލުވެފައިވަނީ 21.4 މިލިއަން ޔޫރޯއަށެވެ. އެހެންކަމުން ޖުމްލަ 70 މިލިއަން ޔޫރޯއަށް ވުރެން ބޮޑު ފައިދާ ސިޓީއެއް ލިބޭނެއެވެ.