ކުރީ ސަރުކާރުގައި ދޫކުރި ފްލެޓާއި ގޯތިކާއި ގުޅޭ މައްސަލައިގައި، ހައުސިން މިނިސްޓަރު ޑރ. އަލީ ހައިދަރާއި ކުރެއްވި ސުވާލަށް މިނިސްޓަރު ޖަވާބު ނުދެއްވުމުން، އެމްޑީޕީގެ މެމްބަރުން މަޖިލީހުގެ ތަޅުމުގައި އިހްތިޖާޖު ކުރުމުން ބައެއް މެމްބަރުންގެ ނަން އިއްވައި މަޖިލީހުގެ ތަޅުމުން ބޭރުކޮށްފިއެވެ.

މިއަދު ކުރިޔަށްދާ ރައްޔިތުންގެ މަޖިލީހުގެ ޖަލްސާ ހޫނުވީ، ހައުސިން މިނިސްޓަރު ޑރ. އަލީ ހައިދަރާއި، އެމްޑީޕީގެ ވައިކަރަދޫ މެންބަރު ޒިޔާދު ކުރެއްވި ސުވާލާއި ގުޅިގެންނެވެ. ކުރީ ސަރުކާރުން ދީފައިވާ ގޯއްޗާއި ފެލްޓެތައް އަތުނުލައްވާނެ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަޢުދުވެވަޑައިގެންފައި ވާއިރު، ފްލެޓާއި ގޯތިތައް ދޫކުރުމުގައި އަމަލު ކުރަމުން އަންނަ ގޮތް ހައުސިން މިނިސްޓްރީން ބަދަލު ކުރީ ރައީސް ޑރ. މުޙައްމަދު މުޢިއްޒާއި މަޝްވަރާކޮށްފައިތޯ ދެންނެވި ސުވާލަށް މިނިސްޓަރު ޖަވާބެއް ނުދެއްވިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، ވައިކަރަދޫ ދާއިރާގެ މެންބަރު ހުސެއިން ޒިޔާދުގެ އިތުރުން، ހިތަދޫ ދެކުނު ދާއިރާގެ މެންބަރު އަދި އެމްޑީޕީގެ ޕާލަމެންޓަރީ ގްރޫޕުގެ ލީޑަރު އިބްރާހިމް ނާޒިލާއި، ކެންދޫ ދާއިރާގެ މެންބަރު މައުރޫފް ޒާކިރާއި ކެޔޮދޫ ދާއިރާގެ މެންބަރު މުހައްމަދު ނިއުޝާދު ނަން އިއްވާފައިވެއެވެ.

ރައްޔިތުންގެ މަޖިލީހުގެ ރައީސް ޢަބްދުއްރަހީމް ވަނީ، މަޖިލީހުގައި މެމްބަރުން ކުރައްވާ ސުވާލަކަށް އެބޭފުޅުން ބޭނުންވާ ގޮތަށް ޖަވާބު ލިބިވަޑައި ނުގަތުމަކީ ނިޒާމީ މައްސަލައެއް ނޫންކަމަށް ވިދާޅުވެ، ވައިކަރަދޫ ދާއިރާގެ މެންބަރު ހުސެއިން ޒިޔާދު ހުށައެޅުއްވި ނިޒާމީ މައްސަލަވެސް ބަލައިނުގަނެފައެވެ. ޖަލްސާގެ ނިޒާމް ގެއްލެން މެދުވެރިވީ އެހާ ހިސާބުންނެވެ.