މިދިޔަ މަހު ރުވާންޑާގައި ބޭއްވި އިންތިހާބު 99 އިންސައްތައިގެ ވޯޓުން ކާމިޔާބުކުރެއްވި ޕޯލް ކަގަމޭ ހަތަރު ވަނަ ދައުރަކަށް ރުވާންޑާގެ ރައީސްކަމުގެ ހުވައިކުރައްވައިފިއެވެ.

ރުވާންޑާގެ ވެރިރަށް ކިގާލީގައި އޮތް ހުވައިކުރުމުގެ ބޮޑު ރަސްމިއްޔާތަށް ބައެއް ގައުމުތަކުގެ ވެރިންނާއި، އެފްރިކާ ގައުމުތަކުގެ މަތީ ފަންތީގެ ބޭފުޅުން ވަނީ ހާޒިރުވެފައެވެ. މި ރަސްމިއްޔާތު އޮތީ 45،000 މީހުންގެ ޖާގަ އޮންނަ ސްޓޭޑިއަމެއްގައި، އާދިއްތަ ދުވަހުއެވެ.

ޖުލައި މަހު ބޭއްވި އިންތިހާބު ކަގަމީ ފަސޭހަކަމާއެކު ކާމިޔާބު ކުރައްވާނެކަމަށް ކުރިން ވެސް އޮތީ ބެލެވިފައެވެ. ކަގަމީ އަކީ އެ ގައުމުގައި 1994 ގައި ހިނގި ގަތުލުއާންމަށްފަހު އެކުލަވާލި ވަގުތީ ސަރުކާރު ހިންގެވުމަށް ހަވާލުވެ، އަދި އޭގެ ފަހުން އެ ގައުމުގެ ރައީސްކަމަށް އިންތިހާބުވި ބޭފުޅާއެވެ. އޭގެ ފަހުން އެއްވެސް އިންތިހާބަކުން ކަގަލީ ބަލިވެފައެއް ނުވެއެވެ. އަދި ކޮންމެ ފަހަރަކު ވެސް އިންތިހާބު ކާމިޔާބު ކުރައްވަނީ 93 އިންސައްތައަށް ވުރެން މަތީ އަގުލަބިއްޔަތަކުންނެވެ.

މި އިންތިހާބުގައި ކަގަމީއާ ދެކޮޅަށް ވާދަކުރުމުގެ ހުއްދަ ދިނީ، އެކަމަށް އެދި ހުށަހެޅި 8 ކެނޑިޑޭޓުންގެ ތެރެއިން ދެ ކެނޑިޑޭޑަކަށެވެ. މިކަމާ ގުޅިގެން ގިނަ ބަޔަކު ވަނީ ކަގަމީއަށް ފާޑު ކިޔާފައެވެ. އަދި ކަގަމީގެ ކާމިޔާބަކީ ރުވާންޑާގައި ޑިމޮކްރަސީ އެއް ނެތްކަން ހާމަކޮށްދޭ ކަމެއްކަމަށް އިދިކޮޅު ފަރާތްތަކުން އަންނަނީ ބުނަމުންނެވެ.

އެ އިންތިހާބުގައި އެ ގައުމުގެ ޑިމޮކްރަޓިކް ގްރީން ޕާޓީއިން ވާދަކުރި ފްރޭންކް ހެބިނޭޒާއަށް ލިބުނީ 0.5 އިންސައްތަ ވޯޓެވެ. އަދި އަމިއްލަ ކެނޑިޑޭޓު، ފިލިޕް ޕައިމާނާއަށް ލިބުނީ 0.32 އިންސައްތަ ވޯޓެވެ.