ހުޅުމާލެއަކީ ހިތްފަސޭހަ ތަނަކަށް ހެދުމަށް ކުރެވޭ މަސައްކަތްތަކުގެ ތެރެއިން، ދުވާރުމަތީގައި ބަހައްޓާފައިވާ ގޮނޑި މޭޒު ނެގުމުގެ މަސައްކަތް ކަމާބެހޭ އިދާރާތަކާ ގުޅިގެން ރަސްމީކޮށް މިއަދު ފަށައިފިއެވެ.

ހުޅުމާލޭގެ އެކި ސަރަހައްދުތަކުގެ ދުވާރު މަތީގައި އަދި ހެޖު ތެރޭގައި ކެފޭ، ރެސްޓޯރެންޓް އަދި ޓޭކް-އަވޭ ޕޮއިންޓުތަކުން ގޮނޑި މޭޒު ބަހައްޓައިގެން ޚިދުމަތްދެމުން ގެންދާތީ އެ ގޮނޑިތަކާއި މޭޒުތައް، އިއްޔެގެ ނިޔަލަށް ނެގުމަށް އެޗްޑީސީން މިމަހުގެ 1 ވަނަ ދުވަހު ވަނީ އަންގާފައެވެ.

އެޗްޑީސީއިން މި މަހުގެ 1 ވަނަ ދުވަހު ނެރުނު އިއުލާނުގައި ބުނެފައިވާ ގޮތުގައި، ދުވާރު މަތިން ގޮނޑި މޭޒު ބަހައްޓައިގެން ޚިދުމަތްދިނުން ހުއްޓާލުމާ ހިލާފުވެއްޖެނަމަ، އެ ތަކެތި ނަގައި، އެ ސަރަހައްދުތައް ސާފުކުރުމުގެ މަސައްކަތް ކަމާ ގުޅުން ހުރި އިދާރާތަކާއި ގުޅިގެން ކުރިޔަށް ގެންދާނެއެވެ. އަދި އެ މަސައްކަތުގައި މުދަލަށް ލިބޭ ގެއްލުމަކަށް އެޗްޑީސީއިން ޒިންމާ ނުވާނެކަމަށް ވެސް ބުނެފައިވެއެވެ.

މިކަމުގެ ސަބަބުން މަގުން ހިނގާ މީހުންނަށް އެކަމުގެ އުނދަގޫ އަންނަނީ އަބަދުވެސް ކުރިމަތިވަމުންނެވެ. މީގެ އިތުރުން ސްކޫލު ހިމެނޭ ސަރަހައްދުތަކުގައި މިގޮތަށް ބަހައްޓާފައިވާ މޭޒުތަކުގެ ކައިރީގައި ތިބެ ދުންފަތުގެ އިސްތިއުމާލު ކުރުމުގެ ސަބަބުން އާންމުންނާއި ކުޑަކުދިންނަށް ދުންފަތުގެ ނޭދެވޭ އަސަރު ކުރުމާއި، އަދަބާ ހިލާފު އިބާރާތްތަކުން މުއާމަލާތްކުރާކަމުގެ ޝަކުވާ، ބެލެނިވެރިންގެ އިތުރުން ސްކޫލުތަކުން ވެސް ކުރެއެވެ.